«Առավոտ»-ը գրում է, թե ինչպես էին Հայաստանի դիվանագետները 2008 թվականի մարտին միջազգային հանրությանը ներկայացնում իրավիճակը և մասնավորապես՝ ընդդիմության առաջնորդի տրամադրվածությունը երկխոսության հանդեպ. «ԵԱՀԿ պաշտոնական կայքէջում այժմ էլ պահպանված են այն բոլոր հայտարարությունները, որոնք այս կապակցությամբ արել էր ԵԱՀԿ-ում Հայաստանի մշտական ներկայացուցիչ Ջիվան Թաբիբյանը: Եվ այսպես՝ 2008 թվականի մարտի 6-ին ԵԱՀԿ մշտական խորհրդի 704-րդ հանդիպման ժամանակ նա հանդես էր եկել հայտարարությամբ, որով մասնավորապես հերքել էր, թե Տեր-Պետրոսյանը ենթարկվել է տնային կալանքի: Պնդել էր, որ նախկին նախագահն ինքն է ասել միջազգային մամուլին, թե ինքը տնային կալանքի ներքո չէ: Ջիվան Թաբիբյանը կրկնել էր այն, ինչ այդ օրերին հայտարարում էին ԱԳ նախարարը և պետական այլ պաշտոնյաներ, որ Տեր-Պետրոսյանը կարող էր հրաժարվել պետական թիկնազորի ծառայությունից և տեղաշարժվել սեփական պատասխանատվությամբ. «Այդ ժամանակ պետությունը չէր ստանձնի նրա անվտանգության պատասխանատվությունը: Մինչ օրս նա մերժել է այդ տարբերակը և այդ այլընտրանքը: Նա նախընտրեց պաշտպանված լինել հենց խիստ «քրեական» ռեժիմի միջոցով»,- մեջբերում է «Առավոտ»-ը:
Անդրադառնալով հայտարարության այն հատվածին, որը վերաբերում է երկխոսությանը, ինչը դեսպան Թաբիբյանն առանձնացրել էր իբրև առանցքային հարց՝ «Առավոտ»-ը մեջբերում է. «Երկխոսության խնդիրն այն է, որ տանգո երկուսով են պարում,- ԵԱՀԿ Մշտական խորհրդում հայտարարել էր նա:- Երկխոսություն արդեն առաջարկվել էր: Փորձ եղել էր երկխոսություն նախաձեռնելու, և դրա լավագույն ապացույցն է, որ երեք թեկնածուներ արդեն միացել են և ընդունել համագործակցության և նոր կառավարություն ձևավորելու առաջարկը»: Սակայն նրանց բոլորից առանձնացրել էր Լևոն Տեր-Պետրոսյանին. «Խոսելու առաջարկը շարունակաբար մերժել է այն թեկնածուն, որի կողմնակիցները կարծում են, թե դա չէ հաջողության ուղին, այլ փողոցն է լավագույն ճանապարհը դեպի իշխանություն՝ ո՛չ քվեախցիկը»:
«Անդրադառնալով Եվրոպական Միության հայտարարությանը, որով քաղաքական բոլոր ուժերին երկխոսության կոչ էր արվում՝ ԵԱՀԿ-ում Հայաստանի մշտական ներկայացուցիչը հայտարարել էր, թե իրենք, իհարկե, որոշ լծակներ ունեն իշխանությունների նկատմամբ, սակայն չեն կարող ազդել ընդդիմության վրա»,- գրում է թերթը և մեջբերում. «2008 թվականի մարտի 13-ին ԵԱՀԿ Մշտական խորհրդի 706-րդ հանդիպման ժամանակ՝ ի պատասխան ԵԱՀԿ գործող նախագահի հատուկ ներկայացուցիչ, դեսպան Հեյկի Թալվիթիեի զեկույցի՝ Ջիվան Թաբիբյանն էլի հանդես էր եկել հայտարարությամբ: Այստեղ որպես ամենակարևոր քաղաքական հայտարարություն Հայաստանի ներկայացուցիչն առանձնացրել էր հետևյալը, թե ինչ է պատրաստվում անել ընդդիմության առաջնորդը Սահմնադրական դատարանի որոշումից հետո՝ «Քանի որ առանց այդ որոշման և առանց արտակարգ դրության վերացման նա չի տեսնում երկխոսելու կետ: Սա հստակ հենց այն է, ինչ նա ասել է»:
Մինչդեռ, ինչպես գրում է թերթը, «մարտի 5-ին ՍԴ-ում ունեցած ելույթում Լևոն Տեր-Պետրոսյանը հայտարարել էր, որ ամբողջությամբ ընդունում է ԵՄ նախագահության առաջարկները. «1. դադարեցնել արտակարգ դրության վիճակը, 2. ազատ արձակել բոլոր ձերբակալվածներին, 3. ապահովել ինֆորմացիոն հավասար հնարավորություններ. 4. իրականացնել Մարտի 1-ի իրադարձությունների միջազգային անկախ հետաքննություն և սկսել երկխոսություն իշխանությունների հետ»:
«Այդ բոլոր կետերը ես ընդունում եմ, և, ինչպես ասացի, համարում եմ մեր գործունեության հիմքը ինչպես ՍԴ-ում, այնպես էլ հրապարակայնորեն»: Միևնույն ժամանակ, Հայաստանի ներկայացուցիչը ԵԱՀԿ մշտական խորհրդի առջև հայտարարում էր. «Իմ տպավորությունն է, որ եթե երկխոսությունը նրանց կարգի մաս կազմեր’ այն տեղի կունենար մինչև մարտի սկզբի դեպքերը»: