ՀՀ տրանսպորտի, կապի և տեղեկատվական տեխնոլոգիաների նախարար Վահան Մարտիրոսյանն ընդունել է Կապի տարածաշրջանային համագործակցության գործադիր կոմիտեի գլխավոր տնօրեն Նուրուդին Մուխիդինովին: Նա Երևանում է՝ մասնակցելու Հեռահաղորդակցության միջազգային միության Սպեկտրի կառավարման հարցերով տարածաշրջանային համաժողովին։
Ն. Մուխիդինովը նախարարին ներկայացրել է իր տպավորությունները համաժողովի աշխատանքների վերաբերյալ։ Նա ընդգծել է համաժողովի բարձր կազմակերպվածությունը և ներկայացուցչական կազմը։
Հանդիպման ընթացքում մտքեր են փոխանակվել Հեռահաղորդակցության միջազգային միության կատարած աշխատանքների, ընթացիկ ծրագրերի և առաջիկա պլանների վերաբերյալ։ Նախարարին ներկայացվել են 2018թ. նախատեսվող ՏՀՏ ոլորտի բարձր մակարդակի աշխատանքային խմբի հանդիպման մանրամասները: Վահան Մարտիրոսյանն առաջարկել է այն անցկացնել Հայաստանում, ինչը համաձայնությամբ ընդունվեց։
Ն. Մուխիդինովը շնորհակալություն է հայտնել նախարարին աջակցության համար: Նա նշել է, որ փոստային կապի ոլորտում Հայաստանն առաջատար դեր ունի, իսկ նախարարության համապատասխան բաժնի աշխատակիցներն իրենց մասնագիտական գիտելիքներով մշտապես պատրաստակամ մոտեցում են ցուցաբերում կոմիտեի աշխատանքներին։
Նախարարն ընդգծել է, որ նախարարությունը պատրաստ է առավել ակտիվ շարունակել համագործակցությունը Կապի տարածաշրջանային համագործակցության կոմիտեի հետ: