Կազանյան հանդիպումից առաջ միջազգային հանրությունը, մասնավորապես Ռուսաստանը ԼՂ հարցի վերաբերյալ լավատեսական հայտարարություններ է անում: Օրեր առաջ Ռուսաստանի ԱԳՆ դեպարտամենտի ղեկավարն էր հայտարարել, որ Ռուսաստանն անելու է հնարավորը ԼՂ հարցում առաջընթացի հասնելու համար: Երեկ էլ Ադրբեջանում Ռուսաստանի դեսպանն է խոսել այն մասին, որ Հայաստանն ու Ադրբեջանը հնարավորություն ունեն հասնելու լուրջ համաձայնության, և Ռուսաստանն ամեն ինչ կանի, որպեսզի այդ հնարավորությունն օգտագործվի:
Միևնույն ժամանակ, սակայն, ադրբեջանական կողմից հնչող հայտարարությունները հույս չեն ներշնչում, որ միջազգային հանրության և Ռուսաստանի ակնկալած առաջընթացը կլինի:
Ռուս փորձագետ Ալեքսանդր Կռիլովի խոսքերով, ընդունված պրակտիկա է, որ նման հանդիպումներից հետո առաջընթաց են համարում անգամ հանդիպման անցկացման փաստը, իսկ հանդիպումից առաջ էլ շատ են հնչում լավատեսական հայտարարություններ:
«Պետք է սպասել կոնկրետ արդյունքների, քանզի դեռևս տեսանելի չեն այն հիմքերը, որոնցից ելնելով կարելի է ասել, որ առաջընթաց կգրանցվի, գլխավոր խոչընդոտը մնում է՝ ո՛չ իշխանությունները, ո՛չ էլ հասարակությունները Հայաստանում և Ադրբեջանում պատրաստ չեն գնալ զիջումների: Իսկ կողմերի նման դիրքորոշման պայմաններում շատ դժվար է հասնել իրական առաջընթացի»,- մանրամասնեց Կռիլովը:
Նրա գնահատմամբ՝ լավատեսական հայտարարությունները հիմնականում դիվանագիտական բնույթ ունեն, իսկ դիվանագիտությունն իր կանոններն ունի, ինչն էլ ենթադրում է, որ անընդհատ անհրաժեշտ է «լավատեսություն ցուցադրել». «Եթե խոսվի այն ամենի մասին, ինչը կա իրականում, ապա նման լավատեսություն չի դրսևորվի»: