«Ես այդտեղ, բացի խայտառակությունից, ուրիշ ոչինչ չեմ տեսնում»,- անդրադառնալով Նորքի զինված խմբի գործին՝ «Առաջին լրատվական»-ի հետ զրույցում ասաց «Ղարաբաղ» կոմիտեի անդամ Աշոտ Մանուչարյանը։
Դատական վերջին նիստի ընթացքում հրապարակվեց Արթուր Վարդանյանի և Վահան Շիրխանյանի զրույցի ձայնագրությունը, որում հիշատակվում էր պաշտպանության նախկին նախարար Սեյրան Օհանյանի անունը և ըստ էության նրա առնչությունը խմբի գործողություններին։ Աշոտ Մանուչարյանն անդրադառնալով Օհանյանի հնարավոր կապին՝ նշեց. «Ինչո՞ւ միայն Սեյրան Օհանյանին, թող այդ նույն գործով նույն միկրոֆոնը կապեին այդ աղջնակի պոչից, Արթուր Վարդանյանին էլ հետը դնեին՝ թող մոտենային ՀՀ ցանկացած կառավարողին ու այնպես անեին, որ մարդն ազնիվ խոսեր։ Բոլորը կասեին, որ Սերժը կործանում է երկիրը։ Եվ ամենակարևորը՝ ցանկացածին դիմես հարցնես՝ ո՞նց անենք, որ Հայաստանում ինչ-որ բան փոխվի, կասի՝ կրակելով, ու կտա հենց առաջին դեմքերի անունը»։
Մանուչարյանը հավելում է. «Գործի մասնակիցներից շատ շատերին ճանաչում եմ՝ Շիրխանյան, Գառնիկ Մարգարյան, Խաչիկ Ավետիսյան, Վոլոդյա Առաքելյան՝ բոլորը երկրին նվիրված մարդիկ են։ Ես վերցնում եմ վատթարագույնը՝ իրոք այդ բոլոր մարդիկ ուզել են Սերժ Սարգսյանին տապալեն, այդ դեպքում պետք է դատարանը պատասխանի հարցին՝ ինչո՞ւ։ Ասենք թե Սամվել Բաբայանի, Ժիրայր Սեֆիլյանի, «Սասնա ծռերի», Նորքի խումբը փորձել են քեզ տապալել, ուրեմն դու ով ես դարձել, ի՞նչ կյանք ես վարել, որ չորս խումբ քեզ փորձել է տապալել։ Նրանց գործողությունը կոչվում է գործողություն ծայրաստիճան անհրաժեշտության պարագայում։
Հարցազրույցն ամբողջությամբ՝ մեր տեսանյութում:
