ԱՄՆ նախագահ Դոնալդ Թրամփը քննարկում է Երուսաղեմն Իսրայելի մայրաքաղաք ճանաչելու հնարավորությունը՝ չնայած իր երեք նախորդների դիրքորոշմանը, սակայն, ըստ ամենայնի, նորից կհետաձգի Իսրայելում ԱՄՆ դեսպանատունը Թել-Ավիվից Երուսաղեմ տեղափոխելը: Այս մասին գրում է Reuters-ը՝ հղում անելով սեփական աղբյուրներին:
Նոյեմբերի 29-ին «Քեշեթ» և «Ռեշեթ» հեռուստաալիքների լուրերի լրագրող Դանա Վայսն իր թվիթերյան էջում գրել էր, որ Երուսաղեմում շատ հնարավոր են համարում, որ ԱՄՆ նախագահ Դոնալդ Թրամփը հաջորդ շաբաթվա սկզբին կհայտարարի Երուսաղեմն Իսրայելի մայրաքաղաք ճանաչելու և դեսպանատունը Թել-Ավիվից տեղափոխելը պատրաստելու մասին:
Հաղորդվում էր, որ Դոնալդ Թրամփը չէր ցանկանա հերթական անգամ երկարաձգել վետոն դեսպանատունը Երուսաղեմ տեղափոխելու մասին օրենքի վրա:
Հունիսի 6-ին ԱՄՆ Սենատը միաձայն հաստատել է Երուսաղեմի վերամիավորման 50-ամյակին նվիրված դեկլարացիան:
Սենատը նաև նորից վավերացրել է Երուսաղեմն Իսրայելի մայրաքաղաք ճանաչելու մասին օրենքը:
Օրենքի համաձայն՝ ամերիկյան դեսպանատունը պետք է Երուսաղեմ տեղափոխվեր 1999 թ. մայիսից ոչ ուշ: Սակայն օրենքը նախատեսում է նաև նախագահի վետո դնելու իրավունք:
