ՀՀ կրթության և գիտության նախարար Լևոն Մկրտչյանը ոլորտը կարգավորող օրենսդրությունը բարելավելու և առկա բացերն ու խնդիրները լուծելու անհրաժեշտություն է տեսնում: Ազգային ժողովում «Մասնագիտական կրթության եւ ուսուցման ոլորտում ընթացող բարեփոխումներն ու օրենսդրական հիմնախնդիրները» թեմայով խորհրդարանական լսումների ընթացքում նախարարն ընդգծեց, որ այս պահին կրթության ոլորտը կարգավորող տարբեր օրենքների միջև առկա հակասությունների պատճառով առաջացել են բացեր և խնդիրներ, որոնք լուծման կարիք ունեն: «Մենք ամենասկզբում ընդունեցինք «Կրթության մասին» օրենքը, որը հնարավորություն էր տալիս կրթությունը դիտարկել մեկ համակարգի մեջ: Սակայն այնուհետև ընդունվեցին «Հանրակրթության մասին», «Միջին մասնագիտական կրթության մասին» օրենքները, որոնք, առանձին-առանձին լուծումներ տալով տարբեր հարցերի, առաջացրին խնդիրներ, երբ մենք չենք կարողանում ներքին օրենսդրական հակասությունների պատճառով սահուն անցումներ կատարել որակավորման մի աստիճանից մյուսին»,- նշեց նախարարը:
Նա ընդգծեց, որ առկա բացերը կարգավորելու համար փորձում են անցնել ընդհանուր կրթական ծրագրի, որպեսզի ՀՀ-ում կրթությունը դիտարկվի մեկ ընդհանուր համակարգի մեջ: «Մենք հիմա փորձում ենք աշխատել սահուն անցումների վրա որակավորման մի աստիճանից մյուսին: Աշխարհում վաղուց միջին մասնագիտական և բարձրագույն կրթությունը դիտարկում են մեկ ամբողջության մեջ և փորձում են ճկուն մեխանիզմներ առաջարկել»,- մանրամասնեց Մկրտչյանը:
Նախարարը կարևորում է հանրակրթական կրթությունից միջին մասնագիտական կրթություն անցումը ճիշտ կազմակերպելը: Նա ընդգծեց, որ տարբեր երկրներում այդ անցումը տարբեր եղանակներով է լինում՝ նշելով, որ Հայաստանում ընտրված է մոդել, որը անհատին հնարավորություն է տալիս մինչև 16 տարեկան ազատ ստանալ հանրակրթական կրթությունը, իսկ դրանից հետո ոչ թե նրան ինչ-որ բան է պարտադրում կամ նրա փոխարեն որոշում, այլ նրա առաջ բացում է միջին մասնագիտական կրթություն ստանալու հնարավորությունները: Լևոն Մկրտչյանը նկատեց, որ կան երկրներ, որտեղ, օրինակ, 6-րդ դասարանից պետությունը երեխաներին ստիպում է ընտրել միջին մասնագիտական կրթության այս կամ այն ուղղությունը, ինչն այնքան էլ ճիշտ տարբերակ չէ:
