«Լավրովն ասաց, բայց կարող էր և նա չասել՝ ցանկացածին է հայտնի, որ Ղարաբաղյան հարցի կարգավորման ուղղությամբ այժմ փոփոխություններ հնարավոր չեն, և մեկ մարդու այցը այդ առումով ոչինչ նշանակել չի կարող»,- «Առաջին լրատվական»-ի հետ զրույցում նման տեսակետ հայտնեց «Կովկաս» ինստիտուտի տնօրեն, քաղաքագետ Ալեքսանդր Իսկանդարյանը։
Նրա խոսքով՝ ոչ միայն կարգավորում, այլև այդ ուղղությամբ նույնիսկ հեռանկարներ չկան՝ Կազանից սկսած: «Եթե մենք ուշադրություն դարձնենք, թե ինչի շուրջ են ընթանում բանակցությունները վերջին տարիների ընթացքում, ապա կտեսնենք, որ ընդամենը վստահության մթնոլորտի, միջադեպերի հետաքննության և այլնի մասին է։ Դա կարգավորման գործընթաց չէ, այլ ընդամենը հակամարտության մենեջմենթ, որով զբաղվում է Մինսկի խումբը։ Դրանով է զբաղվում նաև Լավրովը»,- ասաց քաղաքագետը։
Իսկանդարյանը հավելում է. «Լավրովի պլան գոյություն չի ունեցել։ Այդպիսի թուղթ չկա։ Բայց, այո՛, կա Ռուսաստանի առանձին մոտեցում, կան նաև ԱՄՆ-ի, ԵՄ-ի առանձին մոտեցումներ։ Ընդհանուր շահերը համընկնում են՝ ոչ մեկին այստեղ պատերազմ պետք չէ, պարզապես ամեն կողմը տարբեր գործիքներ ունի։ Հատկապես ռուս-վրացական պատերազմից հետո Ռուսաստանը ավելի շատ գործիքներ ունի, օրինակ՝ զենք է մատակարարում տարածաշրջանի երկրներին։ Բայց պետք չէ դա սխալ հասկանալ, պարզապես քարտ-բլանշի սկզբունքն է. աշխատում է նա, ում ավելի հարմար է»։
