Ավստրալիայում հրդեհի մարման աշխատանքներին մասնակցող ինքնաթիռը վթարի է ենթարկվել և նոր հրկիզում է առաջացրել, հաղորդում է Reuters-ը:
Ինքնաթիռն ընկել է Budawang ազգային այգու տարածքում՝ Նոր Հարավային Ուելս նահանգում, որտեղ հրդեհի պատճառով արտակարգ իրավիճակի ռեժիմ է հաստատվել: Օդաչուի ճակատագրի մասին չի հաղորդվում:
Ավստրալիայում արդեն մեկ շաբաթ է, ինչ մոլեգնում են անտառային հրդեհները: Ներկայումս հրդեհվել է ավելի քան 200 տուն, կրակը ոչնչացրել է 120 հազար հա տարածք, զոհվել է մեկ մարդ:
«Դժվար է ասել, որ վատագույնն արդեն անցյալում է: Օդի ջերմաստիճանն այսօր ավելի ցածր է, և քամին ավելի թույլ է, սակայն բարդ է ասել, թե հրդեհները որքան կշարունակվեն»,- ասել է հրշեջ ծառայության ներկայացուցիչը:
