«Կարծում եմ, այս լավատեսությունն անեսթեզիոլոգիական բնույթ ունի, որովհետև միջազգային հանրությունը պարբերաբար այսպիսի «ներարկումներ» է անում, որպեսզի ստատուս քվոյի պահպանման գործընթացի հիմքը դնեն, որն այս պահի դրությամբ լավագույն տարբերակն է, քանզի, չեմ կարծում, թե կողմերի միջև առաջիկա մեկ ամսում կամ մեկ տարում արմատական փոփոխություններ տեղի ունենան, և նրանք գան ընդհանուր հայտարարի»,- «Առաջին լրատվական»-ի հետ զրույցում խոսելով ԼՂ հարցի կարգավորման վերաբերյալ միջազգային հանրության կողմից հնչող լավատեսական հայտարարությունների մասին՝ կարծիք հայտնեց ԼՂՀ նախագահի մամլո խոսնակ Դավիթ Բաբայանը:
Նրա խոսքերով՝ վերջին շրջանում շատ հետաքրքիր հռետորաբանության ենք ականատես լինում, բավական լավատեսական հայտարարություններ են հնչում, Ադրբեջանն է արդեն խոսում, որ խաղաղ կարգավորմանն այլընտրանք չկա` շարունակելով, սակայն, խախտել հրադադարի ռեժիմը, զուգահեռ նաև պատերազմական հայտարարություններ կատարելով և շեշտելով, թե չի տեսնում Ղարաբաղը Ադրբեջանի կազմից դուրս: Ըստ Բաբայանի՝ այս ամենը պարզապես Կազանից առաջ սկսված աժիոտաժ է, որը միշտ էլ լինում է նման հանդիպումներից առաջ. «Կազանից հետո էլ քննարկելու են, թե ինչու այդ սպասելիքները իրականություն չդարձան, և այսպես շարունակվելու է անընդհատ: Նույնը տեղի ունեցավ Ռամբույեի ժամանակ: Խնդիրն այն է, որ հիմնարար սկզբունքների շուրջ կողմերի կարծիքներն են տարբեր»:
Բաբայանի գնահատմամբ՝ հիմնարար սկզբունքների՝ անվտանգություն, ժողովուրդների ինքնորոշման իրավունք, տարածքային անվտանգություն, խաղաղ կարգավորում, սկզբունքներ են, որոնց շուրջ բոլորն էլ կպայմանավորվեն, այլ բան է, թե կողմերը ինչպես են մեկնաբանում և ինչպես են հասկանում այդ սկզբունքները:
«Մենք էլ ենք ընդունում տարածքային ամբողջականության սկզբունքը, բայց այստեղ կա տարբերություններ կիրառման մեխանիզմների միջև՝ մեզ համար անընդունելի է վերադարձը 1988 թ. տարածքային կարգավիճակին, Ադրբեջանի համար էլ դա է ընդունելի»:
Բաբայանն այս շրջանի ակտիվացումը մի փոքր պոռթկում անվանեց և ընդգծեց, որ դրան հաջորդելու են ամառային արձակուրդները, այնուհետև 2012 թ. կլինի ներքաղաքական ընտրությունների տարի, և այս լավատեսությամբ պետք է պարզապես գործընթացի դինամիկան պահպանել. «Կարծում եմ, Կազանն էֆեկտիվորեն այդ գործը կկատարի»:
Դավիթ Բաբայանի դիտարկմամբ՝ ներկայումս որևէ հիմք չկա ենթադրելու, թե համաձայնություն կլինի, քանզի նախ ձևաչափն է խախտված, և Ղարաբաղը չի մասնակցում բանակցություններին, երկրորդ՝ Ադրբեջանն այնպիսի պահանջներ է դնում, որոնք անհնար է կատարել:
