«Եթե Վարդան Հարությունյանը տենց չորով ասում է, որ զիջումներ չեն լինելու, մենք էլ ենք չորով գնալու մինչև վերջ»,- «Առաջին լրատվական»-ի հետ զրույցում ասաց «Համերաշխություն» ՀԿ նախագահ Արմեն Ներսիսյանը։ Նա չի հասկանում ՊԵԿ նախագահի կոշտ դիրքորոշումը, որով փորձ է արվում նրանց ամբողջությամբ բերել հարկային դաշտ։ Ներսիսյանի խոսքով՝ իրենք պատրաստ են սահմանին ապրանքը մաքսազերծելիս հավելյալ վճարել որոշակի տոկոսներ, բայց դրանով վերջանա, և հարկայինը թողնի իրենց հանգիստ աշխատել։
Նշենք, որ երեկ ՊԵԿ նախագահ Վարդան Հարությունյանը անդրադարձել էր տոնավաճառների աշխատակիցների ակցիային ու պահանջներին՝ հայտարարելով, որ ոչ մի զիջում չի լինելու, բոլորը պետք է աշխատեն հարկային դաշտում, հարկ վճարեն. «Օրենսդրությամբ սահմանված կարգով բոլորը պետք է հարկերը վճարեն: Դուք պետք է կանգնեք մեր կողքին, և բոլոր այն մարդկանց, ովքեր խուսափում են հարկերից, նրանց ոչ թե պետք է քաջալերեք, այլ պետք է ասեք՝ չի կարելի միտինգ անելով՝ խուսափել հարկերից: Դա բացառվում է, չի լինելու նման բան: Նաև ուզում եմ ասել, որ այդ առևտրականների հետ հանդիպում է եղել, մանրամասն բացատրվել է, թե ինչ պետք է անեն: Եթե դրանից էլ են խուսափում ու փորձում էլի մանիպուլյացիաների միջոցով խուսափել հարկերից, նման բան չի լինելու, կոշտ վարչարարություն է լինելու»։
Նրա այս արձագանքի վերաբերյալ Արմեն Ներսիսյանի պատասխանը՝ տեսանյութում։
