Իսպանիայի Սահմանադրական դատարանը չեղյալ է հայտարարել Կատալոնիայի անկախության հռչակագիրը, որը ընդունվել է Կատալոնիայի տեղական խորհրդարանի կողմից այս տարվա հոկտեմբերի 27-ին: Ինչպես փոխանցում է DW-ն, Սահմանադրական դատարանի լիագումար նիստը տեղի է ունեցել այսօր` հոկտեմբերի 31-ին, համաձայն Իսպանիայի Սահմանադրության 161.2-րդ հոդվածի պայմանների:
Միաժամանակ Իսպանիայի գլխավոր դատախազը վերաբացել է կատալոնական տեղական առաջնորդների դեմ արդեն հարուցված գործերը, որոնք հարուցվել էին անջատողականության հրահրման մեղադրանքով: Երկրի Գերագույն դատարանն էլ արդեն վարույթ է ընդունել ինքնավարության խորհրդարանի ղեկավար Կարմա Ֆորկադելայի դեմ հարուցված գործը:
Ավելի վաղ` հոկտեմբերի 28-ին, Մադրիդը զրկել էր Կատալոնիայի տեղական կառավարությանը իր լիազորություններից և ցրել տեղական խորհրդարանը: Իսպանիայի վարչապետ Մարիանո Ռախոյը հայտարարել է, որ Մադրիդն այդ գործողությունն իրականացրել է տեղական առաջնորդների`«չենթարկման քաղաքականության հետագա խորացումը կանխելու համար»: Նշենք, որ ժամանակավորապես Կատալոնիայի մարզի ղեկավարությունը կիրականացնի փոխվարչապետ Սորայա Սաենս դե Սանտամարիան: Տեղական նախարարների լիազորություններն էլ կիրականացնեն Իսպանիայի կենտրոնական կառավարության համապատասխան ոլորտների նախարարները:
