Սերժ Սարգսյանը երեկ երեկոյան հյուրընկալվել է Հայաստանի Հանրապետական կուսակցության «Անդրանիկ Մարգարյան» քաղաքական դպրոցում: Նախագահը հանդիպում է ունեցել դպրոցի ունկնդիրների հետ և այդ լսարանի առջև հանդես եկել դասախոսությամբ: Մասնավորապես, Սերժ Սարգսյանը խոսել է երեք հատկանիշների մասին, որոնք, ըստ երկրի նախագահի, անհրաժեշտություն են ժամանակակից քաղաքական գործչի համար:
«Նախ՝ քաղաքական գործիչը պետք է կարողանա թիմ ձևավորել: Որևէ մեկը միայնակ չի կարող հաջողության հասնել: Միգուցե բիզնեսում շատ թե քիչ կարող է, թեև այստեղ էլ է շատ կարևոր թիմը, միգուցե՝ անձնական կյանքում, բայց քաղաքականությունը ենթադրում է ամուր թիմի առկայություն»,- ասել է Սարգսյանը:
Կարելի է ենթադրել, որ Սերժ Սարգսյանի պատկերացմամբ՝ ինքը թիմ ունի, այն էլ՝ ամենաազդեցիկը Հայաստանում: Այստեղ տեղին է նկատել, որ աղճատված են Սերժ Սարգսյանի պատկերացումները «քաղաքական թիմ» հասկացության վերաբերյալ, որովհետև այսօրվա ՀՀԿ-ն որևէ կերպ չի համապատասխանում դասական կուսակցության չափանիշներին, և ամենևին էլ քաղաքական և գաղափարական հատկանիշները չեն, որոնք միավորում են, ըստ էության, քրեաօլիգարխիկ տանիքի տակ միավորված մարդկանց: Մեծ հաշվով նրանց նույնիսկ Սերժ Սարգսյանի անձը չէ, որ միավորում է, այլ այն ստատուս քվոն, որտեղ համակարգի տարբեր սեգմենտները գտել են իրենց կոմֆորտը:
«Երկրորդ հանգամանքը, որ ուզում եմ շեշտել, և այստեղ ասվեց այդ մասին, բայց ոչ շատ հստակ, քաղաքական գործիչը պետք է կարողանա շատ հավասարակշռված լինել և հանդուրժողական: Քաղաքական գործիչը պետք է հասկանա, որ եթե մտնում է քաղաքականություն՝ հատկապես մեծ քաղաքականություն, ապա միշտ լինելու է քննադատության թիրախ: Եվ ով չի կարողանում ընկալել այդ քննադատությունն ու պահպանել հավասարակշռություն, որքան էլ դժվար լինի, նա չի կարող հասնել հաջողությունների»,- ասել է Սերժ Սարգսյանը: Նրա խոսքերը, որպես տեսություն, իսկապես շատ գեղեցիկ ու տպավորիչ են հնչում:
Գործնականում Հայաստանի իշխանության կողմից չենք տեսել հանդուրժողականության և տոլերանտության դրսևորումներ: Սերժ Սարգսյանը պարբերաբար մեղադրում է լրատվամիջոցներին երկրում գաղջ մթնոլորտ ստեղծելու համար, իսկ այս հանգամանքը լավագույն չափանիշն է, որով կարող ենք գնահատել, թե Սերժ Սարգսյանն ինչպիսի վերաբերմունք ունի այլակարծության և քննադատության հանդեպ: Իսկ իշխանության անհանդուրժողականության ամենաթարմ օրինակին ականատես եղանք հենց երեկ, երբ Սարգսյանի իշխանության առանցքային նախարարներից մեկը՝ Վիգեն Սարգսյանը, խորհրդարանում անխնա քննադատության թիրախ էր դարձրել «Ելք» դաշինքին իր ներկայացրած օրինագծին ընդդիմանալու համար:
«Հաջորդ հատկանիշը, իմ կարծիքով, քաղաքական գործիչների համար այն է, որ նրանք պիտի ունենան իրավիճակը գնահատելու շատ մեծ ունակություն: Ընդհանրապես կյանքում՝ լինի դա զինվորական գործ, բիզնես, լինի, միգուցե, ապագա ընտանիք կազմելու խնդիր, պետք է, իրոք, կարողանալ գնահատել իրավիճակը»,- ասել է Սերժ Սարգսյանը ՀՀԿ դպրոցի ունկնդիրներին:
Ադեկվատությունն իսկապես քաղաքական առաջնորդի կարևոր հատկանիշ է, սակայն այն պետք է ծառայի ոչ թե բացառապես սեփական իշխանության, այլ հատկապես երկրի անկախության, անվտանգության ամրապնդմանը: Սերժ Սարգսյանի իշխանությունը հաջողացրել է ռուսներին տալ այն, ինչ հնարավոր է: Եթե սա է իրավիճակի գնահատման ունակությունը, ապա Սերժ Սարգսյանի և մեր պատկերացումները միանգամայն տարբեր են քաղաքականության վերաբերյալ:
Սերժ Սարգսյանի տասնամյա նախագահությանը բնորոշ է մի հանգամանք՝ նրա խոսքի ու գործի կոնտրաստը, վարվող քաղաքականության հակադրությունը գեղեցիկ ելույթներին և ձևակերպված ծրագրին: Սարգսյանի երեկվա գեղեցիկ դասախոսության և տխուր իրականության կոնտրաստը ասվածի լավագույն դրսևորումն է:
