Ուզբեկստանի արևելյան Ֆերգանա քաղաքի ինտերնետ-սրճարաններում, կարաոկե ակումբներում և այլ հաստատություններում լույս հոկտեմբերի 24-ի գիշերը ձերբակալվել է ավելի քան 100 մարդ։ Այս մասին հայտնում է «Օզոդլիկը» («Ազատություն» ռադիոկայանի ուզբեկական ծառայությունը)։
Ձերբակալվածներին ավտոբուսներով տեղափոխել են Ներքին գործերի Ֆերգանայի մարզային վարչություն։ Այնտեղ նրանց լուսանկարել են, մատնահետքեր վերցրել, անպարկեշտ արտահայտություններ հնչեցրել, և խորհուրդ տալով ուշ ժամի տանից դուրս չգալ՝ ազատ են արձակել։
21-ամյա երիտասարդը պատմել է, որ իրեն ձերբակալել են ժամը 23.00-ի կողմերը, PlayStation սրճարանում։ Նա ասել է, որ ո՛չ խմում է, ո՛չ ծխում, պարզապես նստած ֆուտբոլ է խաղում։ Նրան անվանել են կենդանի և պահանջել փակել բերանը։
Ուզբեկստանի բնակիչների համար նման ռեյդերը սովորական երևույթ են։ Իսլամ Քարիմովի կառավարման տարիներին չի եղել ՆԳ մարմինների գործունեությունը կանոնակարգող օրենք։ Շավկատ Միրզյոևը ստորագրել է նման նորմատիվ ակտ 2016 թվականի սեպտեմբերի 16-ին, կես տարի անց օրենքն ուժի մեջ է մտել։ Այն արգելում է ոստիկաններին դիմել կտտանքների, բռնության և մարդու արժանապատվությունը նվաստացնող այլ վերաբերմունքի։
