Ստեփանակերտում այսօր՝ հոկտեմբերի 20-ին, տեղի է ունեցել սգո երթ` ի հիշատակ հայազգի մեծ գործարար և բարերար Լևոն Հայրապետյանի:
Artsakhpress.am-ի փոխանցմամբ՝ Լևոն Հայրապետյանի հովանավորությամբ կառուցած Սիրո պուրակից երթի մասնակիցները պաստառներով ու բարերարի նկարներով շարժվել են մայրաքաղաքի Սուրբ Հակոբ եկեղեցի, որտեղ էլ նրա հիշատակին կազմակերպվել է մոմավառություն:
Լևոն Հայրապետյանը մահացել է հոկտեմբերի 18-ին 68 տարեկանում: Մոսկվայի հայկական եկեղեցում այսօր տեղի է ունեցել նրա հոգեհանգստի արարողությունը, իսկ հուղարկավորությունը տեղի կունենա վաղը՝ հոկտեմբերի 21-ին:
Գործարարը մեծ ավանդ է ունեցել Արցախի զարգացման և բարեկարգման գործում։ Նրա միջոցներով ծրագրեր են իրականացվել Մարտակերտի շրջանի Վանք գյուղում, վերանորոգվել է Գանձասարի վանական համալիրը։
Կյանքի վերջին տարիները Հայրապետյանը դատական հետապնդումների մեջ անցկացրեց։ Գործարարը դատապարտվել է չորս տարվա ազատազրկման ընդհանուր ռեժիմի գաղութում՝ նախկին սենատոր Իգոր Իզմեստյեվի մորից 700 հազար դոլար կորզելու համար։
Լևոն Հայրապետյանը 2016 թվականին տեղափոխվել էր Մորդովիայի բանտ, որը համարվում է Ռուսաստանի ամենասարսափելի բանտերից մեկը: Նրա փաստաբանը բազմիցս դիմել է Հայաստանին նրա արտահանձնման հարցով։
