Грузия Online-ի փոխանցմամբ՝ Մեծ Բրիտանիան աջակցում է ԵՄ-ին ու ՆԱՏՕ-ին Վրաստանի անդամակցությունը։ Այս մասին հայտարարել է Մեծ Բրիտանիայի միջազգային անվտանգության ռազմավարության հարցերով պաշտպանության նախարարության ներկայացուցիչ Ջերալդ Հովարդը, ով այսօր Թբիլիսիում հանդիպում է ունեցել փոխվարչապետ և եվրաինտեգրման հարցերով պետնախարար Գիորգի Բարամիձեի հետ։
Հանդիպման ժամանակ կողմերը քննարկել են պաշտպանական ու անվտանգության ոլորտներին առնչվող խնդիրներ, ինչպես նաև ՆԱՏՕ-ին ու ԵՄ-ին Վրաստանի անդամակցության հարցը։
Բարամիձեն ուշադրություն է հրավիրել դիվանագիտական ու խաղաղ ճանապարհով ռուս-վրացական հակամարտության կարգավորման և միջազգային հանրության կողմից համարժեք գնահատականի անհրաժեշտության վրա։
Հանդիպումից հետո Հովարդը լրագրողներին հայտարարել է, որ իր վրացական այցը վկայում է ՆԱՏՕ-ին ու ԵՄ-ին Վրաստանի անդամակցությանը Մեծ Բրիտանիայի բացահայտ աջակցության մասին։ Հովարդը նաև շնորհակալություն է հայտնել վրացական կողմին՝ Աֆղանստանում խաղաղապահ առաքելությանը մասնակցելու համար։
Հիշեցնենք, որ ներկայումս Վրաստանը մտադիր է նվազագույնը մեկ գումարտակ ուղարկել Աֆղանստան, ինչի արդյունքում Վրաստանը ՆԱՏՕ-ի անդամ չհանդիսացող երկրների թվում կունենա ամենամեծ ռազմական կոնտինգենտն Աֆղանստանում՝ գերազանցելով Ավստրալիային, որը ներկայումս Աֆղանստանում ունի 1550 զինծառայող։
