2016 թվականի նախագահական ընտրություններում պարտված Հիլարի Քլինթոնը BBC ռադիոյի եթերում հայտարարել է, որ չի ծրագրում 2020 թվականին պայքարել պետության ղեկավարի պաշտոնի համար։
«Ոչ, ես չեմ պատրաստվում մասնակցել»,-ասել է նա՝ պատասխանելով համապատասխան հարցին։
Դրա հետ մեկտեղ Քլինթոնը հավելել է, որ չի դադարի քննադատել Սպիտակ տան գործող ղեկավար Դոնալդ Թրամփին, ավելին՝ կաշխատի այն ուղղությամբ, որ դեմոկրատները չպարտվեն հաջորդ նախագահական մրցապայքարում։
Դեռևս սեպտեմբերի սկզբին CBS հեռուստաալիքի հետ հարցազրույցում Քլինթոնը հայտարարել էր, որ չի ծրագրում մասնակցել 2020 թվականի ընտրություններին։ Սակայն թեման կրկին ակտուալ է դարձել այն բանից հետո, երբ Դոնալդ Թրամփն իր թվիթերյան էջում հույս է հայտնել, որ «խաբեբա Հիլարին» միևնույնն է՝ փորձելու է մրցակցել իր հետ նախագահական աթոռի համար պայքարում։
