ՀՀԿ խմբակցության ղեկավար Գալուստ Սահակյանը այսօր լրագրողների հետ հանդիպման ժամանակ նշեց, որ ՀԱԿ-ի ասածը միջպետական պայմանագրի պես բան չէ, որ իրենք պարտադիր հետևեն։
«Մենք էն պատանիները կամ էրեխեքը չենք, որ 5 հոգի առանձնացնենք, ասենք՝ սա մեր պատվիրակությունն է, գնացեք խոսեք, հլա տենանք ինչ ռեզոնանս է տալի, հետո նորից խոսեք, նորից խոսեք… մենք ասում ենք ցիվիլ, դասական ձևը. մինչև հիմա ինչպես են երկխոսել մամուլով, հեռուստատեսությամբ, կլոր սեղաններով, առանձին քննարկումներով, սեմինարներով, առանձին քննարկումների հարցերով. սա է քաղաքկան դաշտի հիմնական պրակտիկան, եթե դասական ձևով՝ խնդրեմ»։
Լրագրողների այն հարցին, թե ինչ կլինի, եթե չհաջողվի պայմանավորվածություն ձեռք բերել երկխոսությունների օրակարգի, ձևաչափի վերաբերյալ, և ՀԱԿ-ը որոշի դիմել ավելի կոշտ գործողությունների, «նորից ժողովրդին փողոց հանի, անցնի ամենօրյա ցույցերի», Գալուստ Սահակյանն արձագանքեց.
«Դե, որ կարողանար, կհաներ, էլի. փողոց հանի, եսիմ ինչ անի. լրիվ փողոցային են դառե՞լ. ասում եմ՝ թող գան, խոսենք»։
«Առաջին լրատվականը» ՀՀԿ խմբակցության ղեկավարից փորձեց ճշտել, թե հանրահավաքի մասնակցելը, բողոքի ձայն բարձրացնելը Գալուստ Սահակյանը «փողոցայինությու՞ն» է համարում։
«Հիմա փողոց չեն գնում, Ազատության հրապարակ են գնում»,- ճշգրտեց ՀՀԿ-ական պատգամավոր Գալուստ Սահակյանը։