Սաուդյան Արաբիան պատրաստվում է ընդունել ավելի քան 800 հազար մուսուլմանների ամբողջ աշխարհից, որոնք հաջ (ուխտագնացություն) են կատարում այս տարի, չնայած մզկիթի համալիրի վերակառուցմանը և Սաուդյան Արաբիայում գրանցված մահացու վտանգավոր վարակի մասին նախազգուշացումներին, հաղորդում է Russia Today-ը:
Իսլամական երկրներում քաղաքական սրված իրավիճակի ֆոնին Սաուդյան Արաբիան ձեռնարկում է աննախադեպ միջոցներ՝ հաջի քաղաքականացում թույլ չտալու համար:
Հաջի հարցերով նախարար Բանդար Ալ-Հաջարն ընդգծել է քաղաքական ակցիաներ անցկացնելու արգելքին հետևելու անհրաժեշտությունը: Նախարարի խոսքերով՝ երկիրն անում է ամեն ինչ, որպեսզի ընդունի որքան հնարավոր է շատ թվով ուխտագնացների: Նա նշել է, որ Մեքքայում ընթանում է հաջի ենթակառուցվածքի զանգվածային վերակառուցում, ինչի շնորհիվ քաղաքը հավելյալ հնարավորություններ կստանա ուխտագնացներին ընդունելու հարցում:
Հաջի ժամանակ նախատեսվում է գործարկել անվտանգության ոլորտում նորագույն ժամանակակից տեխնոլոգիաներ և սարքեր: Անվտանգության պահպանմանը կհսկեն նաև Սաուդյան Արաբիայի պաշտպանության նախարարության և հետախուզության ուժերը:
Մեքքայի մուտքի մոտ տեղադրվել են էլեկտրոնային դարպասներ՝ ուխտագնացների հոսքը կառավարելու համար: Բացի այդ, դարպասներով կարող են անցնել միայն այն հավատացյալները, որոնք համապատասխան թույլտվություն ունեն: Այս տարի Էր-Ռիադը ստիպված է եղել թագավորության գլխավոր մզկիթներում շինարարական աշխատանքների կապակցությամբ մուսուլման երկրների համար հաջի քվոտաները կրճատել:
Ականատեսների խոսքերով՝ վերջին տասնամյակում Մեքքան փոշոտ քաղաքից վերածվել է փայլող մեգապոլիսի, որտեղ կառուցվում են երկնաքերներ:
Հաջի ժամանակ, որն իսլամի հինգերորդ հիմնասյունն է, մուսուլմաններն ուխտագնացություն են կատարում դեպի Մեքքայի Մասջիդ Ալ-Հարամ մզկիթ: Հաջը սկսվում է մուսուլմանական լուսնային օրացույցի 12-րդ ամսվա սկզբին: Ցանկացած մուսուլման իր կյանքի ընթացքում գոնե մեկ անգամ պետք է հաջ կատարի, եթե ի վիճակի է անել դա: