Կառավարության պարտքի կառավարման 2011-2013թթ. ռազմավարական ծրագրում նախատեսված է, որ կառավարության արտաքին պարտքի սպասարկում/պետական բյուջեի ծախսեր և կառավարության արտաքին պարտքի սպասարկում/բյուջեի սեփական եկամուտներ հարաբերակցությունը առաջիկայում իր առավելագույնին կհասնի 2013թ.` կազմելով համապատասխանաբար 9% և 10.6%:
Կառավարության արտաքին պարտքի սպասարկումը կառավարության արտաքին պարտքի մայր գումարների մարումն է` ավելացրած վարկերի տոկոսավճարները։ Քանի որ Հայաստանի արտաքին պետական պարտքը պարտքի կառավարման ռազմավարական ծրագրով նախատեսված ցուցանիշից ամենայն հավանականությամբ փոքր կլինի նաև 2013թ.-ին (2010թ. վերջին այն նախատեսվածից 300 մլն դոլարով քիչ եղավ), պետք է ենթադրել, որ պարտքի սպասարկման բեռը ևս ավելի փոքր կլինի վերը նշված 9 և 10.6% ցուցանիշներից։
Ի դեպ, նշենք, որ միջազգային մեթոդաբանությամբ ընդունված է որպես արտաքին պարտքի սպասարկման և պետական բյուջեի եկամուտների հարաբերակցության միջինացված ցուցանիշ 22.5%-ը։