Բրազիլիայի ֆուտբոլային ընտրանու նախկին գլխավոր մարզիչ Վանդերլեյ Լյուշեմբուրգուն գաղտնազերծել է «ֆենոմեն» մականվամբ հայտնի բրազիլացի հարձակվող Ռոնալդոյի գաղտնիքը, ով վերջերս ավարտեց իր մարզական կարիերան:
Պարզվում է, որ 1999 թվականին Պարագվայում կայացած Copa America-ի («Ամերիկայի գավաթ») մրցաշարում լեգենդար Ռոնալդոն հանդես է եկել տակաշորերով (памперс): Այն ժամանակ Ռոնալդոն պայքարում էր ավելորդ քաշի դեմ, ինչի համար ստիպված էր ընդունել հատուկ պատրաստուկներ, որոնք ունեին անմիզապահության էֆեկտ: Խաղի ընթացքում խնդիրներ չունենալու համար էլ Ռոնալդոն ստիպված է եղել մարզազգեստի տակից հագնել տարեցների (չափահաս) համար նախատեսված տակդիրներ:
Չնայած այդ ամենին` Ռոնալդոյին հաջողվում է այդ մրցաշարում խփել 5 գնդակ, որոնք Բրազիլիայի ընտրանուն պարգևեցին չեմպիոնական տիտղոսը: Այդ 5 գնդակով Ռոնալդոն ճանաչվեց մրցաշարի գլխավոր ռմբարկու` ստանալով Golden Boot:
Հիշեցնենք, որ Copa America-ն անցկացվում է 1916 թվականից: Ամենից շատ այդ մրցաշարում հաղթել են Արգենտինայի ու Ուրուգվայի ընտրանիները (14-ական տիտղոս): Բրազիլիայի ընտրանին ունի ընդամենը 8 տիտղոս:
