Грузия Online-ի փոխանցմամբ, ScanEx ընկերությունը դիտարկում է անցկացրել Սև ծովում ՝ պարզելու նրա նավթային աղտոտվածության պատճառը։ Պարզվել է, որ Սև ծովի հարավարևելյան հատվածում՝ վրացական Փոթի քաղաքի շրջակայքում, արբանյակները հայտնաբերել են նավթի բնական աղբյուր։
ScanEx ընկերության մասնագետները Շիրշովի անվան Օվկիանոսագիտական ինստիտուտի գիտնականների հետ վերլուծության են ենթարկել 1993-2011 թվականներին արբանյակներից նկարահանված պատկերներ։ Դրանք ցույց են տվել, որ նավթի բնական աղբյուրը գտնվում է Սև ծովի հարավարևելյան հատվածում՝ մոտ 1050 մետր խորության վրա։
Մասնագետները կարծում են, որ այդ նավթային հանքավայրն օրական Սև ծով է արտանետում միջինը 1-8 տոննա նավթ կամ` տարեկան 400-3000 տոննա նավթ։
Չի բացառվում, որ այդ հանքավայրից նավթի բնական արտանետումների տարեկան ծավալը կարող է հասնել մինչև 7000 տոննայի։
Հիշեցնենք, որ նավթային (նաև գազային) ներկրումների ոլորտում Վրաստանը մեծ կախվածություն ունի Ադրբեջանից, որը բավարարում է նրա նավթային կարիքների 80 տոկոսը։