«Առաջին լրատվական»-ի զրուցակիցն է ԵՊՀ բանասիրական ֆակուլտետի դոցենտ, լեզվաբան Նարինե Դիլբարյանը։
–Տիկին Դիլբարյան, ԿԳՆ հանրակրթական դպրոցներում կողմից ռուսաց լեզվի դասավանդման հայեցակարգ է մշակվել, որով առավելություններ են վերապահվելու այս լեզվին։ Մասնավորապես․ ավելացվելու են ռուսաց լեզվի խորացված ուսուցմամբ դպրոցների և դասարանների թիվը, ինչպես նաև «Ռուսաց լեզու» առարկայի պետական ամփոփիչ ատեստավորման ժամանակ ոչ միայն գրավոր, այլ նաև բանավոր խոսքի տիրապետման մակարդակի գնահատում է կատարվելու։ Հայեցակարգի մեջ նշվում է , որ իրավական այս ակտի ընդունման անհրաժեշտությունը « պայմանավորված է վարչապետի հանձնարարականով»։
Ինչպե՞ս կգնահատեք Կարեն Կարապետյանի այս հանձնարարականը և ի՞նչ խնդիրների կարող է սա հանգեցնել։
-Սա նույն շղթայի հաջորդ օղակն է, այսինքն՝ նախատեսել են վերացնել Լեզվի պետական տեսչությունը, որպեսզի այլևս չլինի մարմին, որը կվերահսկի հայոց լեզվի՝ իբրև միակ պետական լեզվի գործառույթները և երկրորդ՝ սկսել են կրթությունից։ Ինչպե՞ս կարելի է մեզ վերադարձնել մեզ այդ ամբողջատիրական ժամանակները՝ դարձյալ լեզվի միջոցով և այն, ինչ ժամանակին չհաջողվեց Արմեն Աշոտյանին, ապա ներկայիս վարչապետը սկսել է դա նոր թափով իրագործել․ ավելացնել ռուսական դպրոցների քանակը մի պետության մեջ , որտեղ ռուս բնակչության թվաքանակը չափազանց սահմանափակ է ՝ կարող է թելադրված լինել միայն քաղաքական նպատակներով․ այլ նպատակ այստեղ լինել չի կարող։
Հայաստանում փոխանակ ավելացնեն անգլերենի կամ չինարենի խորացված ուսուցմամբ դպրոցների քանակը, մեզ դարձյալ վերադարձնում են դեպի ռուսական դպրոցները․ 5-րդ շարասյունը ձևավորելու հզոր գործընթացներ են ծավալվում այսօր։ Վերջին բոլոր զարգացումները ցույց են տալիս, որ Հայոց պետականության մեջ հայերենը կարոտ է օրենսդրական պաշտպանության և կրթական նոր հայեցակարգի ձևավորման․ եկեք հետևենք, թե ինչպես են այսօր խոսում ՀՀ ԱԺ-ի, կառավարության, Երևանի և մարզերի ավագանիների որոշ անդամներ, ինչը ցույց է տալիս, որ շատ քաղաքացիներ այնքան էլ չեն տիրապետում իրենց մայրենիին, ուստի փոխանակ հայեցակարգ մշակենք, թե ինչպես մայրենին լեզուն ավելի գրավիչ դարձնենք, բայց հակառակ դրան այս հիմնական գործը թողած՝ անդրադառնում ենք մեկ օտար լեզվի ուսուցման կարևորությանը, որը ոչ թե կրթական նպատակ ունի, այլ ընդամենը՝ քաղաքական և շատ ցավալի է, որ դա Սեպտեմբերի 21-ի՝ մեր անկախության տոնի նախաշեմին է կատարվում։ Ռուսաստանը շտապում է մեզ ոչնչացնել։
Մանրամասները՝ տեսանյութում։
