Երևանի նոր կանգառասրահները, շրջանառվող լուրերի համաձայն, պատրաստվում են Երևանի քաղաքապետ Տարոն Մարգարյանի արտադրամասերից մեկում:
Երևանի քաղաքապետարանի լրատվության և հասարակայնության հետ կապերի վարչության պետ Արթուր Գևորգյանը, անդրադառնալով այս հարցին, նշեց, որ նոր դիզայնով կանգառասրահներ են լինելու, որոնց դիմաց քաղաքապետարանը ոչ մի գումար չի վճարում:
Արթուր Գևորգյանի խոսքերով՝ եթե յուրաքանչյուր ասեկոսե մենք վերցնենք և հալած յուղի տեղ ընդունենք, ապա քաոսից ուղղակի դուրս չենք գա: Քաղաքում և ընդհանրապես երկրում, ըստ նրա, կլինի քաոս:
Իսկ հարցին,թե որքան է ծախսվում այդ կանգառասրահների վրա, Արթուր Գևորգյանը պատասխանեց, որ թեև կոպիտ է հնչում, բայց «նվեր տված ձիու ատամները չեն հաշվում»: Նա նշեց, որ քաղաքապետարանի գործընկերներն են իրականացնում՝ իրենց միջոցներով:
«Հասկանալի է, որ հարց է առաջանում՝ ինչի՞ համար: Դուք գիտեք, որ կանգառի հարակից տարածքներում կառուցողը ստանում է որոշակի գովազդ տեղադրելու հնարավորություն, և այն որոշակի ժամկետների համար է տրվում»,- հավելեց նա՝ օրինակ բերելով վերգետնյա անցումները, որոնց համար դարձյալ Երևանի քաղաքապետարանի կողմից որևէ գումար չի ծախսվում, կառուցում են քաղաքապետարանի գործընկեր մասնավոր ընկերությունները, կազմակերպությունները, որի դիմաց նրանք ստանում են ինչ-որ ժամանակահատվածում գովազդ տեղադրելու հնարավորություն, և ներդրողն իր գումարները հետ է ստանում. հաշվարկում՝ պարզ մեխանիզմով:
Սա, ըստ զրուցակցիս, արդարացված մոտեցում է, արդյունավետ միջոց և կիրառվում է ամբողջ աշխարհում: Երևանում այն նոր է ներմուծվում:
Իսկ թե որ ՍՊԸ-ն է իրականացնում կանգառասրահների կառուցումը, Արթուր Գևորգյանը խոստացավ ճշտել և տեղեկացնել:
Նա նշեց նաև, որ ներդրողը քաղաքապետարանի հետ հստակեցնում է դրանց դիզյանը:
«Մեկ օրինակ բերեմ՝ քաղաքի նստարանները, որ սիրվեցին բոլորի կողմից և իսկապես անհրաժեշտ էին քաղաքին, դրանք արտադրում է «Նիկոլ Դուման. ՍՊԸ-ն, որը ասում են, որ որոշակի առնչություն ունի ՀՅԴ-ի հետ, և եթե ըստ էության այս տրամաբանությամբ առաջնորդվենք, սրանով մեկընդմիշտ փակվում է թեման առ այն, որ անպայման արտադրում են իրենց արտադրամասում: Առհասարակ, անհասկանալի է՝ ինչու են Տարոն Մարգարյանին որոշակի գործարաններ կամ արտադրամասեր վերագրում: Փառք Աստծո, բոլորիդ աչքի առաջ է եղել Տարոն Մարգարյանի ներկայացրած հայտարարագիրը, որը ևս որոշակի շահարկման թեմա հանդիսացավ»,- ասաց նա:
Դիտարկմանը, թե հանրությանը մինչև այսօր էլ անհասկանալի է՝ որտեղից այդքան գումար քաղաքապետին, Արթուր Գևորգյանը պատասխանեց, որ քաղաքապետը հստակ ասել է և փակել է այդ թեման, և ինքը ավելացնելու ոչինչ չունի:
«Չմոռանանք այդ ունեցվածքի աղբյուրները, չմոռանանք, որ երբ Տարոն Մարգարյանը քաղաքապետ չէր, զբաղվում էր մասնավոր ձեռներեցությամբ, մանր բիզնեսով: Մարդը կարող է լինել հաջողակ և այդ հաջողությունները գրանցելով՝ այդ գումարները ներդնել նաև որոշակի տեղերում: Մարդը ավանդներ ունի ներդրած: Դուք գիտեք, որ ավանդներից ստացվում են գումարներ: Ինձ համար, օրինակ, տաօրինակ է, երբ փորձում են ինչ-ինչ բաներ վերագրել»,-ասաց նա:
Վերջում մեր զրուցակիցը հավելեց, որ այսօր քաղաքապետարանն ավելի թափանցիկ է աշխատում, քան երբևէ:
