Հոկտեմբերի 9-ին կայացել է Լրագրողների համահայկական 6-րդ համաժողովի համակարգող մարմնի նիստը: Ողջունելով նիստի անդամներին ու հյուրերին՝ ՀՀ սփյուռքի նախարար Հրանուշ Հակոբյանը շնորհակալություն է հայտնել լրագրողներին սփյուռքի հիմնախնդիրները վեր հանելու, լուսաբանելու և լուծմանը նպաստելու համար: Այնուհետև նախարարն ամփոփ ներկայացրել է սփյուռքի նախարարության կայացման 5 տարիները, ծրագրերն ու միջոցառումները: «Սփյուռքի նախարարության կայացման գլխավոր դերակատարը Սփյուռքն է, առանց որի մեր ծրագրերը պարզապես չէին իրականանա», -ասել է նա:
Համակարգող մարմնի նախագահ, Լիբանանի «Ազդակ» օրաթերթի գլխավոր խմբագիր Շահան Գանտահարյանը շնորհավորել է ՀՀ սփյուռքի նախարարության 5 ամյա հոբելանի առթիվ և խոսքը փոխանցեց հեռակապով նիստի անդամներին միացած «Արմինիըն միրըր սփեքթէյթըր» պարբերականի խմբագիր եւ հայկական լրատվամիջոցների համակարգող խորհրդի անդամ Հակոբ Վարդիվառյանին:
Ընթացիկ աշխատանքների մասին հակիրճ զեկույցներով հանդես են եկել նաև համակարգող մարմնի մյուս անդամները:
Միջին Արևելքի իրադարձությունների, համայնքային խնդիրների լուսաբանման և թուրքական գործոնի վերաբերյալ զեկուցումով հանդես է եկել Շահան Գանտահարյանը:
ՀՀ սփյուռքի նախարարության կողմից 2013թ. Սփյուռքի լրագրողների համար կազմակերպած դասընթացների և դրանց արդյունքների մասին զեկուցել է մամուլի և հասարակայնության հետ կապերի վարչության պետ Էվելինա Բաղդասարյանը:
ՀՀ սփյուռքի նախարարի տեղակալ Սերժ Սրապիոնյանը առաջարկել է լրագրողների դպրոցի ծրագրում ընդգրկել Սփյուռքի լավագույն ցեղասպանագետների դասախոսությունները:
Լրագրողների համահայկական 7-րդ համաժողովի թեմայի, ձևաչափի, վայրի ու ժամկետի վերաբերյալ առաջարկություններն ամփոփել է ՀՀ սփյուռքի նախարար Հրանուշ Հակոբյանը:
