«Համահայկական բանկ կառույցի կարգավիճակն ինձ անհանգստացնում է»,- «Առաջին լրատվականի» հետ զրույցում ասաց նախկին վարչապետ Հրանտ Բագրատյանը։ Նրա խոսքով, 1992-ին և՛ «Հայաստան» հիմնադրամի, և՛ համահայկական բանկի գաղափարը ընդհանուր զարգացման ծրագրերում եղել է: «Սակայն այն ժամանակ մենք դեռ երիտասարդ էինք, չէինք կարող 15 տարի առաջ տեսնել: Տառացիորեն մի քանի տարի հետո ես հասկացա, որ «Հայաստան» համահայկական հիմնադրամը պետք է վերափոխվի, այդ կառույցը խոր ճգնաժամի մեջ է, հավաքում է տարեկան 10-15 մլն դոլար ու վերջ»,- ասաց նախկին վարչապետը:
Նրա խոսքով, հայությունն այսօր աշխարհում տնօրինում է մոտ 800 մլրդ դոլար կապիտալ, որը կազմում է աշխարհի կապիտալի 0.7-0.8%-ը: Սա այն դեպքում, երբ հայերը կազմում են աշխարհի բնակչության 0.015%-ը: «Եվ այդ 800 մլրդ-ից կարողանում ենք ներգրավել տարեկան 10-15 մլն: Շատ պարզ բացատրություն ունի՝ մեկ անգամ կարելի է նվիրաբերել, հետագայում պետք է «Հայաստան» հիմնադրամը վերափոխվեր ներդրումային հիմնադրամի»,- ասաց Հ. Բագրատյանը՝ հավելելով, որ, իր կարծիքով, մեզ պետք է ներդրումային համահայկական բանկ ստեղծել:
«Որպես սովորական բանկ, որը գրանցվում է ՀՀ ԿԲ-ում և գործում է նորմատիվային այն դաշտում, որում գործում են մնացած 22 բանկերը, նա միայն կխանգարի մյուս բանկերին, որովհետև նրան տվել են համահայկական անունը, ուզում են 100 մլն դոլար էլ փող տալ: Բյուջեից են տալու դա: Սա չստացված թոշակ է ժողովրդի համար: Նման ծրագրերին պետք է զգույշ մոտենալ: Հիմա սրա վրա խոթելու են ամեն տեսակի ոչ շահութաբեր ծրագրեր ու ամեն տարի «սպիսատ» են անելու այդ փողերը: Ես ամենևին չեմ ակնարկում գողությունը, բայց ես ակնարկում եմ այն, որ նման կարգավիճակում հիմա ոչ ոք բանկ չի ստեղծում»,- ասաց նախկին վարչապետը:
Նրա խոսքով` կառավարությունը կարծես թե «ի գիտություն» է ընդունել մոտ 6 ամիս առաջ իր արած այն դիտողությունը, ըստ որի` նման կառույցները պետք է ներդրումային լինեն, և որ «Համահայկական բանկը» միայն կխանգարի մյուս բանկերին: Այսպես, օրենսդրության մեջ փոփոխություն է կատարվում, որով ամրագրվում է, որ «Համահայկական բանկը» միայն 3 տարի և ավելի ժամկետով ծրագրեր կարող է ֆինանսավորել: «Բայց այդուհանդերձ «Համահայկական բանկին» չեն դարձնում ներդրումային բանկ: Գրելով, թե 3 տարուց և ավելի ներդրումներ պետք է անի, կարծում են, թե դրանով մյուս բանկերին չեն խանգարի: Գիտեն, որ մեր առևտրային բանկերը 3 տարուց ավելի ժամկետով վարկեր այսօր չեն էլ տրամադրում: Բայց միևնույնն է, վաղ թե ուշ այդ կառույցը վերանալու է կամ դառնալու է ներդրումային: Իրենք երևի չեն էլ տարբերում ներդրումային հիմնադրամը մյուս կառույցներից: Իրենց թվում է, թե եթե վարկը գնում է ներդրումների ֆինանսավորմանը, ուրեմն խոսքը ներդրումայինի մասին է, իսկ եթե կարճաժամկետ է կամ գնում է ընթացիկ ծախսերի ֆինանսավորմանը, ուրեմն վարկ է»,- եզրափակեց Հ. Բագրատյանը:
Հիշեցնենք, որ երեկ Հայաստանի կենտրոնական բանկը բանկային գործունեության լիցենզիա տրամադրեց «Համահայկական բանկին»։