Հունիսի 3-ին, Մայր Աթոռ Սուրբ Էջմիածնում, Ն.Ս.Օ.Տ.Տ. Գարեգին Բ Ծայրագույն Պատրիարք և Ամենայն Հայոց Կաթողիկոսն ընդունեց Հայկական Բարեգործական Ընդհանուր Միության նախագահ Պերճ Սեդրակյանին, ով Հայաստան է ժամանել Հայոց Ցեղասպանության 100-րդ տարելիցին նվիրված միջոցառումները համակարգող պետական հանձնաժողովի անդրանիկ նիստի և «Հայաստան» համահայկական հիմնադրամի հոգաբարձուների խորհրդի ժողովի առիթով:
Հանդիպմանը Վեհափառ Հայրապետը ողջունեց ՀԲԸՄ նախագահի այցը Հայրենիք և Մայր Աթոռ Սուրբ Էջմիածին, ապա Նորին Սրբությունը և տիար Պերճ Սեդրակյանը քննարկեցին Մայր Աթոռ Ս. Էջմիածնի և Հայկական Բարեգործական Ընդհանուր Միության կողմից իրականացվող համատեղ կրթադաստիարակչական, սոցիալական, եկեղեցաշինական տարբեր ծրագրերի ընթացքը: Այս առիթով Ամենայն Հայոց Հայրապետն իր գնահատանքը հայտնեց ՀԲԸՄ նախագահին Միության անդամների կողմից Հայաստանյայց Առաքելական Ս. Եկեղեցուն և Մայր Աթոռ Ս. Էջմիածնին մշտապես ցուցաբերվող ստաբուխ և նվիրյալ զորակցության համար:
Իր հերթին տիար Պերճ Սեդրակյանը մեծապես կարևորեց Հայ Եկեղեցու և ՀԲԸՄ շարունակական և արդյունաշատ գործակցությունըª ի բարօրություն Հայրենիքի, աշխարհասփյուռ հայ ժողովրդի և ի պայծառություն Ս. Եկեղեցուª վստահեցնելով, որ Միությունը պիտի շարունակի իր նպաստը բերել Հայ Եկեղեցու առաքելության արդյունավետ իրագործմանը և ազգապահպան տարբեր ծրագրերին:
Զրույցի ընթացքում Նորին Սրբությունն անդրադարձավ նաև Հարավային Ամերիկա կատարած հովվապետական այցի մանրամասներին, ինչպես նաև թեմերի և Հարավային Ամերիկայի հայաշատ համայնքների կյանքը հուզող խնդիրներին: Նորին Սրբությունը գոհունակությամբ նշեց նաև, որ Արգենտինա այցի շրջանակներում մասնակցել է ՀԲԸՄ Բուենոս Այրեսի մասնաճյուղի 100-ամյակին նվիրված տոնական հանդիսությանը և հայրապետական պարգևների արժանացրել մասնաճյուղի մի քանի անդամներիª համայնքային կյանքում իրենց գնահատարժան գործունեության համար:
