«Եթե բանակցությունների մասին բաց ինֆորմացիա լինի, կամ ինչ-որ հանգրվանի հասնեն, ապա դա հասարակական կարծիքի վրա անպայմանորեն կազդի»,- «Առաջին լրատվականի» հետ զրույցում, խոսելով ՀԱԿ-իշխանություն առաջիկայում սպասվելիք բանակցությունների մասին, կարծիք հայտնեց Հայաստանի սոցիոլոգների ասոցիացիայի նախագահ Գևորգ Պողոսյանը:
Այդուամենայնիվ, ըստ սոցիոլոգի, արտահերթ ընտրություններ չեն լինի: Պողոսյանի գնահատմամբ՝ այս բանակցություններից առավել շահեկան դիրքում կգտնվեն իշխանությունները, որպես մի համակարգ, որը ճկունություն ցուցաբերեց և կարողացավ ընդդիմության հետ գտնել երկխոսության դաշտ. «Բայց ընդդիմության համար էլ շահեկան գործոններ կան, մասնավորապես այն առումով, որ մինչ օրս մենք չենք տեսել, որ ընդդիմությունը կարողանա իր գործունեության արդյունքում հասնել նրան, որ իշխանությունների հետ կոնկրետ բանակցություններ սկսի»:
Խոսելով մյուս քաղաքական ուժերի մասին՝ Պողոսյանը նշեց, որ դեռևս վաղ է մտածել, որ վերջիններս երկխոսության արդյունքում մարգինալացել են. «Մարգինալացում կլինի, եթե ընդդիմություն-իշխանություն բանակցությունները հանգեցնեն կոնկրետ քայլերի և լուծումների: Հնարավոր է, բանակցությունները որևէ արդյունք չտան և մյուս կուսակցությունները քարտ-բլանշ կստանան՝ ասելով, որ բանակցելը սխալ էր»:
