Թեղուտի հանքի շահագործումը մինչև հիմա մնում է անընդունելի բնապահպանների և հասարակական ակտիվիստների համար: Այսօր լրագրողների հետ հանդիպմանը բնապահպան-ակտիվիստ Լևոն Ստեփանյանը հավաստիացրեց, որ այս հանքը շահագործող ընկերությունը` «Վալեքս գրուպը», մոտ 70 միջազգային և ներպետական օրենքներ է խախտել: Նա նշեց, որ այս ընկերությունը գյուղացիներին խաբելով՝ 1 քմ հողը գնել է անգամ 33-ից 44 դրամով, ապա հավելեց, որ շատ հարցերում գյուղացիների մեղքն էլ կա, նրանք հավատացել են ընկերության ներկայացուցիչներին, սակայն պակաս չեն նաև փաստաթղթային անճշտությունները: Այսօր Թեղուտի բնակիչը առանց անցաթղթի չի կարող գնալ սրբավայր, այդ տարածքը ներառված է հանքարդյունաբերության համար օգտագործվող տարածքում. «Այն, ինչ կատարվում է Թեղուտում, Հայաստանի ապօրինությունների միկրոմոդելն է»:
Ասուլիսի մյուս բանախոս, Թեղուտի բնակիչ Նարե Սմբատյանն էլ ասաց, որ «Վալեքս գրուպի» աշխատակիցները գյուղացիներին այլընտրանք չեն տալիս, ասում են, որ հանքը շահագործվելու է՝ անկախ նրանից, կաշխատեն, թե ոչ. «Ասում են՝ եթե չաշխատեք հանքում, նողեցիներին կբերենք, եթե իրենք էլ չգան, Աֆրիկայից սևամորթ կբերենք, հանքը կշահագործենք»:
Բնապահպան-ակտիվիստ Եղիա Ներսիսյանն էլ վերջում ասաց, որ հոկտեմբերի 10-ին, ժամը 13.00-ին նախատեսում են երթ՝ ի պաշտպանություն Թեղուտի և թեղուտցիների. «Երթը ոչ թե հարցին լուծում տալու միտում ունի, այլ՝ մարդկանց իրազեկելու, թե ինչ է կատարվում երկրում»:
