Բրազիլիզյի գլխավոր դատախազ Ռոդրիգու Ժանոն կոռուպցիոն և փողերի լվացման մեղադրանք է առաջադրել երկրի նախկին նախագահ Ժոզե Սարնյեի, Ազգային խորհրդարանի վերին պալատի նախկին նախագահ Ռենան Կալեյրուսի ու ևս երեք սենատորների դեմ: Այս մասին հայտնում է Globo հեռուստաալիքը:
Քանի որ այդ քրեական գործի մասնակիցների մի մասը գործող խորհրդարանականներ են, նրանց մեղադրանք առաջադրելու մասին վերջնական որոշում պետք է Բրազիլիայի Դաշնային գերագույն դատարանն ընդունի: Հետաքննության վարկածով՝ կասկածյալներն ապօրինի ֆինանսական միջոցներ են ստացել Petrobras պետական նավթագազային հսկայի «դուստր» Transpetro ընկերության նախկին նախագահ Սերժիու Մաշադուից: Փոխարենը՝ նրանք նրան օգնել են պահպանել պաշտոնը և նպաստել են նրա կոմերցիոն գործունեությանը: Մաշադուն նույնպես կասկածյալ է այդ գործով:
