ԵՄ-ի հետ ազատ առևտրի գոտու ստեղծումը, որը նախատեսվում է Ասոցացման համաձայնագրով, որն Ուկրաինան ծրագրում է ստորագրել նոյեմբերին, չի հանգեցնի Մաքսային միության երկրների, մասնավորապես Ռուսաստանի հետ համագործակցության խզման: Այս մասին, ինչպես փոխանցում է RIA Novosti-ն, հայտարարել է Ուկրաինայի նախագահ Վիկտոր Յանուկովիչը՝ Կիրովոգրադում:
«Չնայած եվրոպական ինտեգրման մեր հեռուն գնացող ծրագրերին, մենք ոչ մի դեպքում չենք ծրագրում հարաբերությունների խզում մեր ավանդական գործընկերների՝ Ռուսաստանի, Մաքսային միության երկրների հետ: Ազատ առևտրի համապարփակ գոտու ստեղծումը չի հանգեցնի հարաբերությունների խզման Ռուսաստանի հետ՝ որպես Ուկրաինայի ռազմավարական գործընկերոջ»,- Յանուկովիչի խոսքերն է մեջբերում պետության ղեկավարի մամլո ծառայությունը:
Նա մասնավորապես նշել է, որ Կիրովոգրադի շրջանում միջուկային վառելիքի արտադրության գործարանի շինարարությունը, որն իրականացվում է Ռուսաստանի հետ համագործակցությամբ, կշարունակվի: «Համոզված եմ, որ դա շահավետ կլինի Ուկրաինայի և Ռուսաստանի համար»,- ասել է Յանուկովիչը:
Ռուսաստանը հայտարարում է, որ ԵՄ-ի հետ Ասոցացման համաձայնագրի ստորագրման դեպքում ստիպված կլինի պաշտպանել իր շուկան և կարող է դադարեցնել ազատ առևտրի ռեժիմը Կիևի հետ:
Գործարանի առաջին հերթի շահագործումը ծրագրվում է մինչ 2015-ի վերջը, երկրորդը՝ մինչ 2020 թվականը:
