Զարուհի Փոստանջյանի հարցի շուրջ ստեղծված աղմուկը խլացրեց Ազգային ժողովում նույն օրն արված մի հայտարարություն, որի հեղինակը Հայաստանի վարչապետ Տիգրան Սարգսյանն է: Ի պատասխան ՀԱԿ-ի խորհրդարանական խմբակցության քարտուղար Արամ Մանուկյանի հարցի՝ հայ-ռուսական գազային պայմանագիրը տրամադրելու վերաբերյալ, Հայաստանի վարչապետը հայտարարեց, որ պայմանագիր դեռ չկա ու երբ լինի, այն անպայմանորեն ներկայացվելու է պատգամավորներին:
Թվում է, որ հասարակության ուշադրությունը պետք է գրավեր այս հայտարարությո՛ւնը, ոչ թե Զարուհի Փոստանջյանն ու նրա հարցը: Սակայն հասարակությունը անհաղորդ մնաց: Մինչդեռ, խորհրդարանում երեկ պարզվեց, որ առնվազն էներգետիկայի նախարար Արմեն Մովսիսյանը ամիսներ շարունակ հրապարակավ սուտ է խոսել, իսկ կառավարությունը, իշխանությունը ամբողջությամբ ուղղակի լսել է նրա սուտը և չի փորձել փակել ստախոսի բերանը: Այսինքն՝ Արմեն Մովսիսյանը մի քանի ամիս է՝ գազի գնի թանկացման «ՀայՌուսգազարդի» հայտին զուգահեռ հայտարարում է, թե կոնկրետ չի հիշում՝ երբ է Ռուսաստանը թանկացրել Հայաստանի գազը, բայց դա եղել է ընտրություններից հետո: Նկատենք, Արմեն Մովսիսյանը չէր ասում, թե թանկացման հայ-ռուսական պայմանագիր դեռ չկա, ի՜նչ թանկացում, ի՜նչ բան: Նա ընդամենը ասում էր, որ չի հիշում, թե կոնկրետ որ օրն էր թանկացումը: Եվ այս ամենը Մովսիսյանը ասել է մի քանի անգամ ու հրապարակավ:
Այսինքն՝ իշխանությունից մեկն ու մեկը գոնե մեկ անգամ սա լսած պետք է լիներ և Արմեն Մովսիսյանին պետք է ասած լիներ՝ լսիր, գազի թանկացման պայմանագիր դեռ չկա, ի՞նչ ես ասում, թե չես հիշում կոնկրետ օրը: Բայց ոչ մեկը Արմեն Մովսիսյանին չէր խանգարում նույն բանը կրկնել մի քանի անգամ: Ոչ մեկը չխանգարեց նաև «ՀայՌուսգազարդին»՝ հայտ ներկայացնել Հանրային ծառայությունները կարգավորող հանձնաժողով, թե իբր գազը թանկացել է, և մենք էլ ստիպված թանկացնելու ենք: Ընդ որում՝ նույն վարչապետ Տիգրան Սարգսյանն էլ չհայտարարեց, թե՝ ա՛յ «ՀայՌուսգազարդ», ախր, դեռ գազի գնի պայմանագիր չկա, սպասի՛ր, երբ կլինի, այն ժամանակ էլ կներկայացնես թանկացման հայտը: Ավելին՝ Տիգրան Սարգսյանը նույնիսկ հայտարարեց, որ կառավարությունը կսուբսիդավորի թանկ գազի 30 տոկոսը:
Այսպիսով՝ տեղի է ունեցել հասարակության հանդեպ մեծ խաբեություն, քանի որ հիմա պարզվում է, որ գազի գնի նոր պայմանագիր չկա: Ընդ որում՝ չի հայտարարվում, որ կա նոր գնի սահմանման որևէ այլ իրավական փաստաթուղթ: Հետևաբար, կա՛մ Հայաստանի Հանրապետության քաղաքացիներին իշխանությունը պարզապես ամենացինիկ ձևով խաբել է, կամ էլ հայ-ռուսական հարաբերությունները բարձրացել են որակապես լիովին այլ մակարդակի, և այստեղ արդեն փաստաղթղթերի կարիք չի զգացվում: Թեև Ռուսաստանում նույնիսկ ներքին սուբյեկտների հետ հարաբերություններում փաստաթղթերն անխուսափելի են, և եթե Հայաստանի վրա Ռուսաստանը գազը ներկայումս ավելի թանկ է հաշվում՝ առանց որևէ պայմանագրի, ապա դա նշանակում է, որ Հայաստանին նույնիսկ ավելի ցածր են համարում, քան սեփական դաշնային սուբյեկտներին:
Իշխանությունը թող գոնե այս հարցին անկեղծ պատասխանի՝ հիմա խաբե՞լ են ժողովրդին, թե՞ իսկապես թանկ են վճարում, սակայն առանց որևէ թղթի:
Լուսանկարը՝ PanARMENIAN Photo-ի
