Թուրքիայի վարչապետ Ռեջեփ Թայիփ Էրդողանը հայտարարել է երկրում քաղաքական բարեփոխումների ծրագրի մասին: Մասնավորապես, նա հայտարարել է պետական հաստատություններում հիջաբ կրելու արգելքի շուտափույթ վերացման մասին: Այս մասին փոխանցում է Reuters գործակալությունը:
Հիջաբ կրելու գործող արգելքը կտարածվի միայն իրավապահ մարմինների աշխատակցուհիների և զինված ուժերի կին ծառայողների վրա:
Բարեփոխումների մի ողջ փաթեթ կուղղվի ազգային փոքրամասնությունների վիճակի բարելավմանը: Քրդերին կթույլատրվի վերականգնել բնակավայրերի պատմական քրդական անվանումները: Կհանվի քրդական այբուբենի օգտագործման արգելքը: Բացի այդ, ոչ պետական դպրոցներում հնարավոր կլինի ուսուցումը համայնքի լեզվով:
Որոշ դրույթներ էլ կբարելավեն ասորիների վիճակը: Էրդողանը հայտարարել է, որ սիրիական ուղղափառ եկեղեցու քրիստոնյաներին կվերադարձվեն վանական հողերը, որոնք առգրավվել էին պետության կողմից:
Էրդողանն առաջարկել է նաև կուսակցությունների համար նվազեցնել խորհրդարանական ընտրական շեմը՝ 10 տոկոսից հասցնելով 5 տոկոսի: Այդ միջոցառումը կոչված է աջակցելու քրդամետ քաղաքական կուսակցություններին, որոնք լայն աջակցություն են վայելում առանձին տարածքներում, սակայն համազգային մակարդակով չեն կարող բավականաչափ ձայներ հավաքել:
Վարչապետը նշել է, որ այդ բոլոր բարեփոխումներն ուղղված են երկրի ընդհանուր ժողովրդավարացմանը:
