Boston Consulting Group (BCG) խորհրդատվական ընկերությունը հրապարակել է Global Wealth 2011 հետազոտության արդյունքները, որով փորձել է պարզել, թե որ երկրում են ապրում ամենաշատ հարուստ ընտանիքները (ավելի քան 100մլն դոլար): Այս մասին հաղորդում է Коммерсант-ը:
Ըստ այդմ պարզվել է, որ այդ ցուցակը մեծ առավելությամբ գլխավորում է ԱՄՆ-ը (2692 տնային տնտեսություն), երկրորդ տեղում է Գերմանիան (839): Հաջորդ հորիզոնականները զբաղեցնում են Սաուդիան Արաբիան (826), Մեծ Բրիտանիան (738), Ռուսաստանը (561):
Միևնույն ժամանակ, ինչպես նշում է թերթը, մեկ միլիոն դոլարից ավելի կարողություն ունեցողների համաշխարհային առաջատար է Սինգապուրը՝ ընտանիքների 15.5%-ը միլիոնատեր են: Համեմատության համար ասենք, որ Շվեյցարիայում այդ թիվը կազմում է 9.9%, Քաթարում` 8.9%, Հոնգ Կոնգում՝ 8.7%, իսկ ԱՄՆ-ում՝ 4.5%: Իսկ Ռուսաստանում նման ընտանիքները կազմում են մոտավորապես մեկ տոկոս:
Ընդհանուր առմամբ՝ միլիոնատեր տնային տնտեսությունների ցուցակը աշխարհում գլխավորում է ԱՄՆ-ը (5.22 մլն տնային տնտեսություն), նշում է Bloomberg-ը: Երկրորդ հորիզոնականում է Ճապոնիան (1.53 մլն), իսկ երրորդում՝ Չինաստանը, որտեղ 2010 թ.-ին միլիոնատեր-ընտանիքների քանակն աճել է 31%-ով` հասնելով 1.1 մլն-ի: