Грузия Online-ի փոխանցմամբ՝ Վրաստանի նախագահ Միխեիլ Սաակաշվիլին Euronews ին տված հարցազրույցում հայտարարել է, որ բավական անհանգստացած է ռուսաստանյան զարգացումներից.
«Ես չափազանց անհանգստացած եմ Ռուսաստանում տեղի ունեցող գործընթացներից։ Ինձ ամենից շատ անհանգստացնում է այն, որ Ռուսաստանում ոչինչ չի փոխվում։ Նա շարունակում է ընդլայնել իր ռազմական հզորությունը և ավելացնել հարևանների նկատմամբ ագրեսիվությունը։
Մյուս կողմից էլ ինձ անհանգստացնում է Ռուսաստանի թուլությունը։ Այնտեղ ակնհայտ են ներքին, կառուցվածքային բնույթի և կոռուպցիային առնչվող խնդիրները։
Մեզ պետք է գտնել ոսկե միջինը։ Մեզ անհրաժեշտ է, որ Ռուսաստանը լինի առավել բաց, լիբերալ և առավել ժամանակակից, որպեսզի այդպիսի Ռուսաստանի հետ մենք կարողանանք ընդհանուր լեզու գտնել։
Մենք ինքնասպաններ չենք և չենք ցանկանում հակամարտության մեջ մտնել Ռուսաստանի հետ։ Մենք արդեն ականատես ենք եղել, թե դա ինչպիսի բացասական հետևանքներ է ունեցել։
Բայց մյուս կողմից էլ մենք ցանկանում ենք պահպանել մեր ազատությունն ու անկախությունը, մենք չենք ցանկանում վերադառնալ ռուսական կայսրության գերիշխանությանը։ Իհարկե, դա ֆանտաստիկայի ժանրից է, սակայն այն դեռ նստած է որոշ քաղաքական գործիչների ուղեղներում, որոնց գլխավորում է Ռուսաստանի վարչապետ Վլադիմիր Պուտինը։ Իսկ դա մեծ խնդիր է ստեղծում»։
Հիշեցնենք, որ մայիսի 25-ին էլ Սաակաշվիլին ուկրաինական հեռուստաալիքներին տրված հարցազրույցի ժամանակ նշել էր. «Ռուսաստանը մեզ հաճախ մեղադրում է 2008 թվականին պատերազմ սանձազերծելու մեջ: Սակայն բոլորը գիտեն, որ դա այդպես չէ: Մենք չենք հարձակվել խաղաղ քնած Ցխինվալի վրա: Ռուսաստանը երկար ժամանակ էր պատրաստվել դրան:
Մենք ինքնասպաններ չենք և բնականաբար չէինք ցանկանում հակամարտության մեջ մտնել Ռուսաստանի հետ: Մենք արել ենք ամեն ինչ, որպեսզի խուսափենք դրանից: Սակայն նրանք դա վաղօրոք էին պլանավորել: Պուտինը բազմիցս հայտարարել է, որ այդ պատերազմն անխուսափելի է»։
