Դովիլյան հայտարարությունից հետո շատ է խոսվում այն մասին, թե ԼՂ հարցի կարգավորումն այժմ նոր փուլ է մտել, և հունիսին Կազանում սպասվելիք եռակողմ հանդիպման ժամանակ մենք ականատես ենք լինելու էական փոփոխությունների:
ԱԺ ԲՀԿ խմբակցության պատգամավոր, ԱԺ Եվրոպական ինտեգրման հարցերի մշտական հանձնաժողովի նախագահ Նաիրա Զոհրաբյանը «Առաջին լրատվական»-ի հետ զրույցում կարծիք հայտնեց, որ ԵԱՀԿ Մինսկի խմբի համանախագահող երկրների նախագահների վերջին հայտարարությունը որոշակիորեն ավելի հստակեցում էր պարունակում. «Եթե համանախագահների, համանախագահող երկրների նախագահների նախորդ հայտարարությունները շատ ավելի ընդհանուր էին, ապա այս անգամ հստակ էր մեսիջը, որ ժողովուրդներին պետք է պատրաստել խաղաղության: Ակնհայտ էր նաև այն, որ համանախագահող երկրները արդեն որոշակի տեղաշարժ են ակնկալում Կազանում»:
Այդուամենայնիվ, ըստ Զոհրաբյանի, այս հայտարարությունն ու դրանում եղած ակնկալիքները խնդրի մի կողմն են, և հայկական կողմը ևս բազմիցս ասել է, որ պատրաստ է կառուցողական բանակցային դաշտում հասնել խնդրի լուծման միջազգային իրավունքի իրավահավասար նորմերի շրջանակում. «Մենք բոլորս ցանկանում ենք, որ խնդիրը լուծվի խաղաղ ճանապարհով և միջազգային իրավունքի եռամիասնության նորմերի շրջանակում, բայց ադրբեջանական կողմի ոչ կառուցողական դիրքորոշումը ինձ լավատեսություն չի ներշնչում, որ Կազանում առաջընթաց կլինի: Եթե Կազանում առաջընթաց չարձանագրվի, ապա միանշանակ է, որ դրա պատասխանատուն լինելու է ադրբեջանական կողմը»:
Զոհրաբյանն իր կարծիքը հիմնավորելու համար հիշեցրեց, որ նույն Դովիլի հայտարարությունից հետո ադրբեջանական կողմն իր երկրի առաջին դեմքերի մակարդակով կրկին անգամ խոսեց Ադրբեջանի` իրենց համար ընդունելի տարածքների շրջանակում տարածքային բարձրագույն իրավունքի մասին:
Զոհրաբյանը նաև նկատեց, որ, միևնույն ժամանակ, համանախագահող երկրների նախագահները հստակ չեն արձագանքել Ադրբեջանի ներքին գործերի նախարար Մամեդյարովի այն հայտարարությանը, թե առնվազն ծիծաղելի է հայկական կողմի տեսակետը, որ պետք է շփման գծից հետ քաշել դիպուկահարներին. «Նա նշել էր, թե այդ դեպքում ինչի համար են դիպուկահարները: Սա նշանակում է, որ այդ երկրի համար մեկ դիվանագետն ուղղակիորեն հաստատում է, թե դիպուկահարները նրա համար են, որ սպանեն հայ զինվորներին: Ադրբեջանի դիպուկահարներին վարժեցնող կազմակերպության ղեկավարը ևս հայտարարել էր, որ իրենք դպրոցական հասակից դիպուկահարներ են պատրաստում հայ զինվորին սպանելու համար, և ես զարմանում եմ, որ դիվանագիտական այս կոպիտ ձևակերպմանը միջազգային հանրության արձագանքը չեղավ»:
Զոհրաբյանը տեղեկացրեց, որ այդ հարցն ինքը բարձրացնելու է ԵԽԽՎ հունիսյան նստաշրջանում: