Ինչպես գրում է ռուսական Независимая газета-ն, ԱՄՆ-ում արդեն հասկացրել են, որ պատրաստ են աշխատել այն ղեկավարի հետ, որը կհաղթի 2012 թ. նախագահական ընտրությունների ժամանակ: Այնտեղ հանգիստ են վերաբերվում Պուտինի հնարավոր վերադարձին: Մանավանդ եթե որպես վարչապետ նա նշանակի Ալեքսեյ Կուդրինին կամ Իգոր Շուվալովին: Այսպիսի կարծիքներ են արտահայտում այսօր Վաշինգտոնի քաղաքագետները, որոնք սերտ հարաբերությունների մեջ են Օբամայի աշխատակազմի հետ:
Վերջինս, ի դեպ, արդեն հրավիրել է Ռուսաստանի վարչապետին այցելելու Վաշինգտոն: Եվ նույնիսկ որպես վարչապետ նրան կընդունեն ամենաբարձր մակարդակով: Այս հրավերը, ինչպես կարծում է Ազգային շահերի կենտրոնի նախագահ Դմիտրի Սայմսը, «ինքին խոսուն է», հատկապես Ռուսաստանում նախագահական ընտրութոյունների նախօրեին:
Այդուհանդերձ, Վաշինգտոնում կրկին մեծ հույսեր են կապում նախագահ Մեդվեդևի հետ: Այն հաջողությունները, որոնց նա հասել է ԱՄՆ-ի հետ «վերաբեռնման» ժամանակ, Օբաման հմտորեն օգտագործում է ԱՄՆ-ի ներսում իր վարկանիշը բարձրացնելու համար:
Օբամայի կողմից Մեդվեդևի «մեծարման» փաստը կարող է վատ անդրադառնալ ՌԴ նախագահի վրա, քանի որ Օբամայի հակառակորդները, որոնք ԱՄՆ նախագահից լուրջ դժգոհություններ ունեն, կարող են ընդունել, այսպես կոչված, «Սերգեյ Մագնիտսկու փոփոխությունները» (Սերգեյ Մագնիտսկին ամերիկյան Hermitage Capital ներդրումային ընկերության իրավաբանն էր, որը, ըստ որոշ տեղեկությունների, սպանվել է ռուսական բանտում: Այս գործը դարձել է արևմտյան իրավապաշտպանների և քաղաքական գործիչների թիվ մեկ առաջնահերթություններից մեկը Ռուսաստանի հետ հարաբերություններում.- 1in.am), որոնք նախատեսում են ռուսաստանցի այն չինովնիկների հաշվեհամարների սառեցում և ԱՄՆ մուտք գործելու արգելում, որոնք մեղավոր են Մագնիտսկու մահվան մեջ:
