Նաիրիտի բաժնետոմսերի 90%-ը 2006 թ. «Ռայնովիլ Փրոփըրթի» ընկերությանը մասնավորեցնելուց հետո ամենաշատ արտադրանքը արձանագրվել է 2007-2008 թթ., երբ գազի գինը սահմանին 54 դոլար/1խմ էր։ Այս մասին այսօր կառավարության նիստի ժամանակ ասաց Էներգետիկայի և բնական պաշարների նախարար Արմեն Մովսիսիյանը։
«Դրանից հետո գազի գինը աստիճանաբար բարձրացավ՝ բավականին ծանր ազդեցություն թողնելով Նաիրիտի ամբողջ տնտեսության վրա։ Դա բերում էր ինքնարժեքի թանկացման, անհրաժեշտ էր անընդհատ նոր շուկաներ փնտրել։ Բայց ունեին խնդիր՝ քլորոպրենային կաուչուկների վերականգնումը, որը նույնպես հարցականի տակ ընկավ, այն պատճառով, որ միջազգային շուկայում նավթամթերքների գները սկսեցին աննախադեպ աճ գրանց, իսկ բութադիենը նավթամթերքի ածանցյալ է, և այս պարագայում բնականաբար կաուչուկների գինը համարժեք արձագանք չէր գտնում՝ կախված նավթամթերքների գնի աննախադեպ աճից։ Եվ վերջնակետը դարձավ 2008 թ. միջազգային ճգնաժամը, որի արդյունքում ամբողջ համաշխարհային տնտեսությունը, այդ թվում նաև քիմիական ոլորտտ հայտնվեց կոլապսի մեջ։ Խնդիր առաջացավ նոր զարգացման ծրագիր ստեղծելու և իրականացնելու։
2010 թ.-ին բաժնետերերի կողմից հաստատվեց նոր զարգացման ծրագիրը, որը հիմնված էր հետճգնաժամային ժամանակամիջոցում ստեղծված նոր մոտեցումների վրա և ավելի մեծ ներդրումներ էր պահանջում, քան այն ծրագիրը, որը կար նախաճգնաժամային վիճակում։ Ծրագիրն արդեն պատրաստ է, այս պահին ամբողջ ծրագիրը հետաքրքրությունների հայտ ստանալու նպատակով հայտարարության տեսքով դրված է մեր նախարարության կայքում (http://www.minenergy.am/images/stories/documents/NAIRIT.pdf)։ Փնտրում ենք միջազգային օպերատոր, որը որ ի վիճակի կլինի և ձեռնամուխ կլինի այս ծրագրի իրագործմանը։ Անհրաժեշտ է մոտավորապես 400-500 մլն դոլարի ներդրումներ, որ Նաիրիտի հարցը վերջնական լուծվի և Նաիրիտը դուրս գա միջազգային չափանիշների։ Անհրաժեշտ են այնպիսի օպերատորներ, որոնք այսօրվա շուկայում կարող են գործ ունենալ նման մեծ ներդրումների, մեծ ֆինանսական միջոցների հետ»,- ասաց Ա. Մովսիսյանը՝ հավելելով. «գտնում եմ, որ այն ճանապարհով, որով գնում ենք, հնարավորություն կտա այս վիճակից ուղղակի փրկելու «Նաիրիտը»»։
Նախարարի խոսքով՝ հայտեր ներկայացնելու վերաբերյալ հայտարարությունը տրվել է մոտ մեկ ամիս առաջ, իսկ հայտերի ներկայացման վերջնաժամկետը հունիսի 15-ն է։ ՀՀ վարչապետ Տիգրան Սարգսյանն էլ ասաց, որ այս մրցույթի վերաբերյալ կառավարությունը տեղյակ է պահել Եվրոբանկին ու Արժույթի միջազգային հիմնադրամին։ Ա. Մովսիսյանը նշեց, որ «Նաիրիտում» աուդիտ է անցկացվել, որի եզրակացությունը նույնպես դրված է նախարարության կայքում։ «Որպեսզի նաև օպերատորը հստակ պատկերացում ունենա «Նաիրիտի» ֆինանսական վիճակի վերաբերյալ, հանձնարարված է ֆինանսների նախարարության աուդիտին և ՊԵԿ-ին, որպեսզի իրականացնեն ստուգումներ և ամենք ունենանք ամբողջական պատկերը»,- հայտարարեց վարչապետը։