Ադրբեջանական Salam News գործակալության փոխանցմամբ, Ռուսաստանի արտգործնախարարության կովկասյան դեպարտամենտի տնօրեն Անդրեյ Կելինն անդրադարձել է կազանյան եռակողմ հանդիպմանը.
«Ներկայումս ընթանում են այդ հանդիպման նախապատրաստական աշխատանքները։ Դրա վրա աշխատում են նախագահները, նախարարները զբաղված են համապատասխան նյութերի նախապատրաստմամբ։ Տվյալ գործընթացին մասնակցում են նաև համանախագահները։ Մենք նույնպես մասնակցում ենք այդ հանդիպման նախապատրաստմանը։
Ռուսաստանը պատրաստ է բոլոր ջանքերը ներդնել հակամարտության կարգավորման գործում։ Սակայն դրան հասնելու համար անհրաժեշտ է կողմերի կամքը։ Մենք կարծում ենք, որ այժմ անհրաժեշտ է առավելագույն ջանքեր ներդնել հակամարտության խաղաղ կարգավորման համար։ Այդ ուղղությամբ անհրաժեշտ է աշխատել նաև կազանյան հանդիպումից հետո»։
Հիշեցնենք, որ Հայաստանի, Ադրբեջանի և Ռուսաստանի նախագահների եռակողմ հանդիպումը Կազանում կայանալու է հունիսի 25-ին։