Այսօր Կենտրոն և Նորք-Մարաշ վարչական շրջանների ընդհանուր իրավասության դատարանում մեղադրող դատախազ Արամ Արամյանը հրապարակել է «Նորք-Մարաշի» զինված խմբի 20 անդամի մեղադրական եզրակացությունը: Ըստ այդմ՝ Վահան Շիրխանյանը ծանոթացել է Արթուր Վարդանյանի հետ, նա խորհուրդ է տվել Հայաստանում իշխանափոխության հասնելու գործողություններում զերծ մնալ պետական մարմինների վրա հարձակումներ գործելուց, նա իշխանափոխության հասնելու հնարավոր տարբերակներից է համարել Սերժ Սարգսյանի վրա մահափորձ իրականացնելու ճանապարհը: Վահան Շիրխանյանը նաև պարտավորվել է ապահովել բանակի մասնակցությունը, կամ ապահովել բանակի չեզոքությունն այդ գործընթացներում, քանի որ անձամբ ծանոթ է եղել Պաշտպանության արդեն նախկին նախարար Սեյրան Օհանյանի հետ: Ստեղծված զինված խմբի անդամները քննարկել են նաև թռիչքի պահին Սերժ Սարգսյանի ինքնաթիռը խոցելու հնարավորությունը, սակայն այդ ուղղությամբ որոշակի քայլեր չեն ձեռնարկվել:
Մեղադրական եզրակացությունը մի քանի ուշագրավ հարցեր է ծնում: Մեր հասարակության մի զգալի հատվածը մինչև հիմա էլ մտածում է, որ այս զինված խմբի պատմությունը բեմականացված է իշխանությունների կողմից` PR-ի և ներհամակարգային ինչ-որ խնդիրներ լուծելու նպատակով: Թերևս նման պնդումների պատճառն այն է, որ զինված խմբի ղեկավարը և անդամների մեծ մասը հանրությանն անծանոթ մարդիկ են և մինչ այդ քաղաքակական պահանջներով հանդես չեն եկել: Մյուս կողմից` ահաբեկչական ակտերի հեղինակները, որպես կանոն, հայտնի են դառնում հենց գործողություններից հետո:
Եթե մեղադրական եզրակացությունն իսկապես հիմնված է անհերքելի ապացույցների վրա, ապա բնական հարց է առաջանում, թե Արթուր Վարդանյանին և նրա հանցախմբին ո՞վ կամ ովքե՞ր են դրդել հրեշավոր գործողության կազմակերպմանը, որովհետև արժանահավատ չէ, որ ամբաստանյալի աթոռին հայտնված մարդիկ սեփական ուժերով կարող էին հեղաշրջում կազմակերպել կամ խոցել նախագահի ինքնաթիռը: Արդյո՞ք իշխանություններն ունեն այս հարցի պատասխանը, և քննության խնդիրն է եղել միայն կատարողներին բացահայտելը, որովհետև հնարավոր պատվիրատուի հետքերը տանում են երկրից դուրս` ազդեցիկ որևէ կենտրոն, որին անհասանելի են մեր իշխանության ձեռքերը: Թե՞ պատվիրատուները կամ առնվազն կասկածյալները միանգամայն այլ տեղ են, պատկերավոր ասած` Սերժ Սարգսյանի «քթի» տակ, և նրանք այս տարիներին դուրս են մղվել համակարգից` ֆիլտրումների հետևանքով: Օրինակ՝ այս գործի տարբեր դրվագներում հիշատակվում է Սեյրան Օհանյանի անունը: Արդյո՞ք ՊՆ նախկին նախարարը պաշտոնանկ է արվել, որովհետև իսկապես ինչ-որ առնչություններ է ունեցել զինված խմբի հետ:
Սակայն կան ավելի գլոբալ հարցադրումներ: Իսկական ողբերգություն է այն հանգամանքը, որ վերջին չորս տարիներին բացահայտվել կամ վնասազերծվել է չորս զինված հանցախումբ, որոնք նպատակ են ունեցել տապալելու Սերժ Սարգսյանի իշխանությունը: Սա ուղղակի հետևանք է իշխանության անորակ, անտաղանդ կառավարման, նաև նրա, որ մեր հասարակությունը չունի ապաշնորհ իշխանությանը հեռացնելու ավելի ռացիոնալ տարբերակներ ընտրելու կարողություն:
