Այս տարի արդեն երկրորդ անգամ Ամերիկայի Հայկական Համագումարը (Համագումար) հրավիրվել է Կոնգրեսին ներկայացնելու հաշվետվություն ամերիկահայ համայնքին հուզող հարցերի շուրջ: Այս քայլը զայրացրել է Միացյալ Նահանգներում Ադրբեջանի դեսպան Էլին Սուլեյմանովին, ով արտահայտել է իր «զարմանքը» Ամերիկայի Հայկական Համագումարի հաշվետվության վերաբերյալ: Նա փորձել է վիճարկել ամերիկահայերի զեկույց պատրաստելու իրավունքը` ուղղված Ադրբեջանի ագրեսիվ դիրքորոշմանը հայերի նկատմամբ, որն ավելի վաղ այս տարի լսվել է Կոնգրեսում` «Անհանգիստ գործընկեր. աճող ավտորիտարիզմ Ադրբեջանում՚ խորագրով:
Այսօր Համագումարի հրապարակած նոր տեսագրությունը անդրադառնում է դեսպան Սուլեյմանովի արձագանքին և Համագումարի հաշվետվության բաժիններին, հատկապես Ադրբեջանի պետական հովանավորությամբ մշակութային ցեղասպանության քաղաքականությանը, ինչի օրինակն է հայկական հնագույն գերեզմանատան ոչնչացումը Ջուղայում, ինչպես նաև Ադրբեջանում մարդու իրավունքների և մամուլի ազատության դրության վատթարացմանը, այնուհետև ադրբեջանցի զինվոր Ռամիլ Սաֆարովի հայրենադարձությանը, ներում շնորհելուն ու փառաբանմանը, ով 2004 թվականին Հունգարիայում ՆԱՏՕ-ի «Գործընկերություն հանուն խաղաղության» ուսումնական դասընթացի ժամանակ կացինով դաժանորեն սպանել էր հայ սպա Գուրգեն Մարգարյանին մինչ վերջինս քնած էր:
«Ադրբեջանի կառավարությունը կարող է ճոխ ընդունելություններ կազմակերպել ամերիկացի պաշտոնյաների համար իրենց երկրում և գործի դնել հանրային կապերի հնարքները` փորձելով ամերիկացիների ուշադրությունը շեղել իրենց նավթային ավտորիտար օլիգարխիայից»,- հայտնում է Ամերիկայի Հայկական Համագումարի կապերի և տեղեկատվության գծով տնօրեն Դանիել Քուշակջյանը, հավելելով. «Բարեբախտաբար, ամերիկացիները, հատկապես Կոնրգրեսում մեր ընտրված պաշտոնյաները, շատ ավելի տեղեկացված են»:
Ինչպես հաղորդվել է ավելի վաղ, Համագումարն առավել կենտրոնացած է ձեռնարկելու անհրաժեշտ քայլեր, որպեսզի պաշտպանի ամերիկահայ համայնքը Ադրբեջանի կողմից եկող շարունակական վտանգներից: Այս տարվա փետրվարին համագումարը տարածեց 10 էջանոց հաղորդագրություն Սումգայիթի ջարդերի և Ադրբեջանի` քրիստոնյա հայերին որպես թիրախ դարձնելու մասին: Հուլիսին Համագումարը նոր փաստաթուղթ հրապարակել Ադրբեջանի մասին, որը քննարկվել է Կոնգրեսի անդամների հետ:
