Օրերս համացանցում է հայտնվել մի նոր տիրույթ, որը նվիրված է երկրորդ նախագահ Ռոբերտ Քոչարյանին, որտեղ տեսանյութեր են հրապարակվում քաղաքացիների հարցման մասին, որի բոլոր մասնակիցները իրենց հիացմունքն են հայտնում Ռոբերտ Քոչարյանի կառավարումից և հայտնում նրան ձայն տալու պատրաստակամություն:
Համացանցն իհարկե ներկայումս տալիս է տեխնոլոգիական շատ հնարավորություններ, և դժվար է ասել, թե հատկապես ով է սկսել զբաղվել Ռոբերտ Քոչարյանի գովազդով: Գուցե հենց ինքը՝ Քոչարյանը, իսկ գուցե նաև մարդիկ, ովքեր կցանկանային, որ նա դառնար ծիծաղի առարկա: Բանն այն է, որ նկատի ունենալով հասարակական ներկայիս վերաբերմունքը Ռոբերտ Քոչարյանի հանդեպ, պարզապես ծիծաղելի է դառնում այն գովազդը, որ մատուցվում է համացանցում:
Հետևաբար կամ գործ ունենք շատ վատ քարոզչական գաղափարի հետ, կամ պարզապես դիտավորության, որի նպատակն է Ռոբերտ Քոչարյանին դնել ծիծաղելի վիճակում: Բանն այն է, որ եթե որևէ գործիչ ունի իրական վարկանիշ ունի իրական հասարակական պահանջարկ, ունի քաղաքականության մեջ իրական ասելիք ու անելիք, ապա դուրս է գալիս հրապարակ և սկսում է գործել, ոչ թե մտնում է համացանց և սկսում պատրաստել քարոզչական հոլովակներ խորհրդային պրոպագանդայի մաշված և նույնիսկ արդեն բավական քրքրված ոճով:
Այդ ոճին դիմում են այն գործիչներն ու ուժերը, որոնք հասկանում են, որ հրապարակային գործունեության որևէ այլ շանս, այլ մեկնակետ, այլ հրապարակ, չունեն և առաջիկայում, տեսանելի ապագայում չեն կարող ունենալ: Քոչարյանի համացանցային քարոզչությունը կարծես թե խոսում է հենց այդ դեպքի մասին: Այլապես Ռոբերտ Քոչարյանը պետք է ոչ միայն չհեռանար ակտիվ քաղաքականությունից, այլ ներկայումս նա պետք է քաղաքական ակտիվ գործոն լիներ, հանդես գար հրապարակային քաղաքական գործունեությամբ, իրեն այդքան սպասող հասարակությանը, իրեն այդքան երկրպագող և իրեն ձայն տալու պատրաստ քաղաքացիներին առաջարկեր ելքեր, զարգացման տարբերակներ, առաջարկեր առաջընթացի պլատֆորմ:
Երբ այդ ամենը չկա, եղած գովազդային հոլովակներն արդեն դառնում են ծիծաղելի, խոսում թերևս լիարժեքության բարդույթի, մեծության մոլուցքի կամ այլ հոգեբանական անառողջ գործընթացների մասին: Թեև օրինակ չի բացառվում, որ եղածի հետ Ռոբերտ Քոչարյանն իսկապես կապ չունի: Բայց կարծես թե առկա է պարզաբանման անհրաժեշտություն: Երևի թե շատերին հետաքրքիր կլիներ ոչ միայն քաղաքացիների կարծիքը Ռոբերտ Քոչարյանի մասին, այլ Քոչարյանի կարծիքը իր վերաբերյալ գովազդային այդ նախաձեռնության մասին:
