Վրաստանի նախագահ Միխեիլ Սաակաշվիլին ՄԱԿ-ի Գլխավոր ասամբլեայում ելույթի ժամանակ ամփոփել է իր նախագահական կառավարման արդյունքները՝ հայտնում է RIA Novosti-ն:
«Ծառայության իմ երկրորդ ժամկետը մոտենում է ավարտին, և ես հպարտանում եմ շատ հաջողություններով, որոնց Վրաստանը հասել է իմ նախագահության ընթացքում»,- հայտարարել է Սաակաշվիլին: Նրա խոսքով՝ շատ հաջողությունների համար ստիպված են եղել վճարել «շատ բարձր գին՝ փորձի պակասի, ինչպես նաև արտաքին սպառնալիքների պատճառով»:
Բացի այդ, նա ՄԱԿ-ի երկրներին կոչ է արել ազդել ռուս-վրացական հարաբերություններում ստեղծված իրավիճակի վրա, և հայտարարել է, որ կասկածում է Ռուսաստանի ու Վրաստանի միջև հարաբերությունների հաստատմանը՝ չնայած նոր իշխանությունների գալուն:
Նշենք, որ Ռուսաստանի պատվիրակությունը չի լսել Սաակաշվիլիի ելույթը և լքել է Գլխավոր ասամբլեայի դահլիճը՝ ի նշան նրա գնահատականների հետ անհամաձայնության: Այս մասին հայտնել է ՌԴ ԱԳՆ ներկայացուցիչ Ալեքսանդր Լուկաշևիչը:
Իր ելույթում Սաակաշվիլին մասնավորապես հայտարարել էր, որ ի տարբերություն երկրների մեծ մասի՝ Ռուսաստանը հետաքրքրված չէ իր հարևանների կայունությամբ և հերքում է ուժեղ կառավարության գաղափարը Վրաստանում, Ուկրաինայում և Մոլդովայում: Նա նաև քննադատել էր Եվրասիական միության գաղափարն ու մեղադրել Ռուսաստանին Աբխազիայի և Հարավային Օսիայի օկուպացման մեջ:
Ավելի վաղ ՄԱԿ-ում Ռուսաստանի մշտական ներկայացուցիչն առաջարկել էր ստուգել Սաակաշվիլիի հոգեկան վիճակը՝ կապված Գլխավոր ասամբլեայում նրա «ռուսաֆոբ» արտահայտությունների հետ:
