Այսօրվանից «Ռադիո Հայ» ՍՊԸ-ն գործադուլ է հայտարարում մինչև սույն թվականի հոկտեմբերի 4-ը՝ ի նշան բողոքի: Յուրաքանչյուր աշխատանքային օր՝ սկսած ժամը 12-ից, մեկ ժամով կդադարեցվի «Ռադիո Հայ» ռադիոկայանի հեռարձակումը, իսկ մյուս ժամերին կիրականացվի ավտոմատացված եղանակով:
Բանն այն է, որ ՀՀ կառավարությանն առընթեր Պետական եկամուտների կոմիտեն որոշում է կայացրել արտահերթ ստուգումներ անցկացնելու հեռարձակող ԶԼՄ-ների շրջանակներում։ Այդ կապակցությամբ ս.թ. սեպտեմբերի 23-ին ՊԵԿ նախագահը հանձնարարագիր է ստորագրել, որի համաձայն՝ «Ռադիո Հայ» ՍՊԸ-ում և ևս մեկ ռադիոընկերությունում իրականացվելու են արտադրանքի արտադրության, օգտակար հանածոների արդյունահանման, իրացման, ապրանքների շրջանառության և ծառայությունների մատուցման ծավալների, ապրանքների պակասորդի, ինչպես նաև իրացման փաստացի գների (սակագների), այդ թվում՝ միջին, չափագրումներ։ Ընդ որում՝ «Ռադիո Հայ» ՍՊԸ-ում այդ չափագրումները պետք է ներառեն 01.01.2009 թվականից սկսված ժամանակահատվածը։
«Ռադիո Հայ» ՍՊԸ-ի տնօրեն, ՀՀ նախագահի նախկին թեկնածու Անդրիաս Ղուկասյանը «Առաջին լրատվական»-ի հետ զրույցում հարցին, թե Հայաստանի օրենսդրությունը նախատեսո՞ւմ է, որ հարկային մարմինները կարող են ուսումնասիրություններ անցկացնել հարկատուների մոտ և կատարել չափագրումներ արտադրության, օգտակար հանածոների արդյունահանման և իրացման, ապրանքների շրջանառության և ծառայությունների մատուցման ծավալների, ապրանքների պակասորդի, ինչպես նաև իրացման փաստացի գների (սակագների), այդ թվում՝ միջին, չափագրման վերաբերյալ, նշեց, որ ստուգումը առնվազն երկու ռադիոկայանի նկատմամբ է իրականացվել՝ «Ռադիո Հայ»-ի և FM 107-ի:
«Մեր կարծիքով՝ դա չի համապատասխանում օրենքի տառին: Քանի որ այդ հանձնարարագրում կոնկրետ նշված չէր ռադիոկայանի գործունեությանը վերաբերող առարկան և նրա չափագրման եղանակը, ռադիոկայանի տնօրինությունը օրենքով սահմանված կարգով արգելել է ուսումնասիրության իրականացումը՝ ՊԵԿ-ի աշխատակիցներին առաջարկելով կոնկրետացնել, թե ինչն են ուզում չափագրել: Ակնհայտ է, որ ռադիոկայանը չունի օգտակար հանածոներ, չունի ապրանքի արտադրություն: Օրենքն էլ իր հերթին պահանջում է, որ հստակ սահմանված լինեն ստուգվող առարկան, վայրը, ժամանակը և մնացած անհրաժեշտ բնութագրող գործոնները, ինչը հրամանագրում բացակայում էր, և ինչի պատճառով էլ «Ռադիո Հայ»-ի տնօրինությունը որոշեց, որ գործունեությունը օրինական չէ, և համապատասխան քայլ կատարեց, քանի որ ՊԵԿ-ը չգիտի՝ ինչն է չափագրելու»,- նշեց Անդրիաս Ղուկասյանը:
Անդրիաս Ղուկասյանը նաև տեղեկացրեց, որ հարկային տեսչությունը նմանատիպ հանձնարարագիր է ուղարկել նաև Անահիտ Թարխանյանի մեկ այլ ձեռնարկության՝ «ԱՅ ճարտարապետներ» ՍՊԸ-ին:
«Սա հիմք տվեց համարելու, որ սրանք քաղաքական հիմք ունեցող գործողություններ են, և որոշեցինք գործադուլով հանրության ուշադրությունը սևեռել այս խնդրին»,- ասաց Անդրիաս Ղուկասյանը:
Հարցին՝ այս ճնշումը պայմանավորում եք վերջին տարիների Ձեր քաղաքական գործունեությա՞մբ, Անդրիաս Ղուկասյանը նշեց, որ այլ բան դժվար է պատկերացնել:
Նա նշեց, որ իրենք դիմադրելու են օրենքի շրջանակում և օրենքով սահմանված կարգով:
«Հավելեմ, որ ՊԵԿ-ի ցանկում 2013-2014թթ. ստուգվող կազմակերպությունների ցանկում «Ռադիո Հայ»-ը և «ԱՅ Ճարտարապետներ» ՍՊԸ-ն ընդգրկված չեն, և սա ՊԵԿ-ի կողմից արտահերթ ստուգումներ անցկացնելու փորձ է: Բնականաբար, սա լուրջ հիմք է տալիս ենթադրելու, որ ՊԵԿ-ը ոչ թե մտահոգված է հարկային տվյալներ ճշտելու հարցով, այլ փորձում է հարկային օրենսդրությունը օգտագործել քաղաքական հետապնդումներ իրականացնելու համար»,- ասաց Անդրիաս Ղուկասյանը:
