«Դովիլյան հայտարարությունը ավելի կոշտ նրբերանգներով էր, քան արվում են նմանատիպ հայտարարությունները: Դա նկատվել է շատերի կողմից, սակայն ձևակերպումներում կոշտությունը դեռ չի նշանակում, որ կողմերը համաձայն են դրանց հետ»,- «Առաջին լրատվականի» հետ զրույցում, խոսելով Մեծ ութնյակի գագաթնաժողովի ընթացքում ԼՂ հարցի վերաբերյալ Մինսկի խմբի համանախագահող երկրների նախագահների համատեղ հայտարարության մասին, կարծիք հայտնեց Ռազմավարական մշակույթի ռուսական հիմնադրամի փոխնախագահ Անդրեյ Արեշևը:
Արեշևը նկատեց, որ ներկա պահին նույն այդ միջնորդներն ունեն բազմաթիվ խնդիրներ: Նրա խոսքերով, ԼՂ հարցի կարգավորման միջնորդությունն ընթանում է առավել գլոբալ հարցերի հետ միահյուսված և դրանց ֆոնին համարվում է երկրորդական թե՛ կողմերի և թե՛ մասնավորապես միջնորդ երկրների ներքաղաքական և արտաքին քաղաքական սցենարների նկատմամբ. «Միացյալ Նահանգները, Մերձավոր և Միջին Արևելքում հայտնվելով բարդ իրավիճակում, Հարավային Կովկասում սեփական շահերն է հետապնդում, այդ թվում` նաև Իրանի հարցի ենթատեքստում: Ռուսաստանը ևս իր հետաքրքրություններն ունի, մասնավորապես կապված սպասվելիք նախագահական ընտրությունների հետ, և այս ամենը անդրադառնում է ԼՂ հարցի կարգավորման միջոցների և ձևաչափի վրա»:
Նկատենք, որ ԱՄՆ, Ֆրանսիայի և Ռուսաստանի նախագահներն իրենց հայտարարությունում ընդգծել էին, որ հունիսին սպասվելիք Սարգսյան-Ալիև-Մեդվեդև հանդիպման ժամանակ պետք է ավարտվեն հիմնարար սկզբունքների շուրջ աշխատանքները: Արեշևի գնահատմամբ, այն դիվանագիտական ակտիվությունը, որ կա Կազանի հանդիպումից առաջ, կբերի բավականին համեստ արդյունքներ. «Քանզի ԼՂ հարցի էությունը և նրա հետ կապված բարդ հարցերը, ցավոք սրտի, այդքան էլ հստակ չեն, և Կազանում ինչ-որ փաստաթղթի ստորագրման հնարավորությունը ես համարում եմ խիստ անհավանական»:
