Հունահռոմեական ոճի ըմբշամարտի Հայաստանի ազգային հավաքականի գլխավոր մարզիչ Լևոն Ջուլֆալակյանը պատասխանեց լրագրողների հարցերին.
«Արթուր Ալեքսանյանի գոտեմարտը չեմպիոնական էր: Ռուսաստանը միշտ ձգտում է վերցնել մեդալների առյուծի բաժինը: Այդ գոտեմարտն իրականում մերն էր: Արթուր Ալեքսանյանը եզրափակիչ գոտեմարտում ավելի լարված էր: Նա հոգեբանական խնդիրներ չունի, բայց եզրափակիչում լարվածությունը մեծ է: Նա մեր ձայները չլսեց, որ միավոր է պետք:
Ռոման Ամոյանի համար պետք է բոլորս ուրախանանք: Ռայաֆել Մարտինետիի նման վարվելակերպից հետո շատ մարզիկներ կարող են ուղղակի հեռանալ սպորտից: Ռոմանն իր լավագույն մարզավիճակում չէր, բայց լուրջ հաղթանակներ տարավ և մոտ էր եզրափակիչին:
Մրցավարության հետ կապված լուրջ փոփոխություններ կային: Բացի այդ, կանոնակարգն է փոխվել: Բոլոր մասնագետներն էին վրդովված, ՖԻԼԱ-ի նախկին նախագահը հեռացվեց աշխատանքից, իսկ հիմա ամեն ինչ նորմալ է, հաղթում է ուժեղը, պատահականություններ գրեթե չեն լինում: Հղկման տեղ կա, բայց դա հնարավոր է անել:
Ըմբշամարտի նախկին ֆեդերացիան սեփականաշնորհված էր Ադրբեջանի կողմից, բայց հիմա սեփականաշնորհումից դուրս է եկել:
Արծաթե մեդալը բողոքարկելու քաղաքավարի ձև կա: Մենք դիմելու ենք ըմբշամարտի ֆեդերացիա` այդ մրցավարին պատժելու խնդրանքով: Երևույթը տհաճ է: Մասնագետները հիասթափվում են նման գոտեմարտերից հետո:
Առաջիկայում Եվրոպայի գավաթի խաղարկությունն է: Մենք ցանկանում ենք երիտասարդներին հանարավորություն տալ, իսկ մեծահասակների հավաքականը կնախապատրաստվի Հայաստանի առաջնությանը:
Ինչ վերաբերում է Դավիթ Սաֆարյանին, ապա նա դեռ Եվրոպայի առաջնությունում ապացուցեց, որ ինքը լավագույնն է այդ քաշային կարգում: Նրա գոտեմարտերը ցույց տվեցին, որ պայքարում էր մինչև վերջին վայրկյանը և հավատում էր, որ պետք է հաղթի»:
