Ռուսաստանի Տամբովի մարզի N3 քրեակատարողական հիմնարկում պատիժը կրող ՀՀ քաղաքացի Հրաչյա Հարությունյանի Հայաստան փոխանցումը կկատարվի առաջիկա օրերին: Ներկայումս օրվա հետ կապված պայմանավորվածություններ են գնում:
«Արդարադատության նախարարությունը ներկայում միջոցներ է ձեռնարկում ՌԴ իրավասու մարմինների հետ դատապարտյալ Հրաչյա Հարությունյանի փոխանցման օրը համաձայնեցնելու ուղղությամբ»,- «Առաջին լրատվական»-ի հետ զրույցում ասացին արդարադատության նախարարությունից:
Ինչ վերաբերում է Հրաչյա Հարությունյանին փոխանցելուց հետո նրա պահման պայմաններին, վայրին և հարցին, թե նա արդյոք հետագայում հնարավորություն կունենա՞ պայմանական վաղակետ ազատ արձակվել, ապա այդ հարցերը դեռ հստակ չեն և փոխանցումից հետո նոր պարզ կլինեն:
Հրաչյա Հարությունյանի հարազատները ևս սպասողական վիճակում են: Նրանք էլ գիտեն այն, ինչ իրենց փոխանցվել է նախարարությունից: «Սպասում ենք, ասել են՝ առաջիկա օրերին, ոչ ավելի, քան մի շաբաթ: Տեսնենք»,- մեզ հետ զրույցում ասաց Հարությունյանի աները՝ Վիկտոր Մարտիրոսյանը:
Հիշեցնենք, որ Հրաչյա Հարությունյանը ՌԴ-ում ազատազրկման էր դատապարտվել 6 տարի 9 ամիս ժամկետով այն բանի համար, որ 2013 թվականի հուլիսի 13-ին ՌԴ Պոդոլսկի շրջանի մերձակայքում «Կամազ» մակնիշի բեռնատար մեքենայով բախվել էր մարդատար ավտոբուսին, ինչի հետևանքով մահացել էր 18 մարդ: Հրաչյա Հարությունյանին մեղադրանք էր առաջադրվել ՌԴ քրեական օրենսգրքի 264 (երթևեկության կանոնների խախտում և տրանսպորտային միջոցների շահագործում) և 327 (փաստաթղթերի կեղծում, պատրաստում կամ իրացում) հոդվածներով:
