Հայաստանի՝ ԵԱՏՄ երկամյա անդամակցության արդյունքում անդամ երկրների ապրանքաշրջանառությունը տարեցտարի աճել է։ Հայաստանի՝ ԵԱՏՄ-ին անդամակցության երկու տարիները ամփոփող քննարկումից հետո լրագրողների հետ զրույցում ասաց ՀՀ տնտեսական զարգացման և ներդրումների նախարար Սուրեն Կարայանը՝ ավելացնելով, որ 2016 թվականին Հայաստանից վերամշակված, պատրաստի արտադրանքի արտահանման ծավալները ռուսական շուկա աճել են 51.3 տոկոսով, ղազախական, ղրղզական և բելառուսական շուկա՝ մի քանի անգամ։
Սուրեն Կարայանի խոսքով՝ ԵԱՏՄ-ի կողմից շուկաների ազատականացումը տվեց իր արդյունքները: «Իհարկե, կարևոր է ներդրումային միջավայրի գրավչությունը, ինչը նշանակում է, որ միանալով ԵԱՏՄ-ին՝ ներդրողները ներդրում են կատարում 180 միլիոնանոց շուկայում: Այն ներդրումային ակտիվությունը, որ տեսնում ենք, խոսում է այն մասին, որ ներդրողները առավել շահագրգռված են ներդրումներ կատարել Հայաստանում»,- ասաց նախարարը:
ԵԱՏՄ-ի տված դրական կարևոր արդյունքներից է, ըստ Սուրեն Կարայանի, էներգակիրների ներդրումը Հայաստանում: Նրա խոսքով՝ միանալով ԵԱՏՄ-ին՝ մենք հնարավորություն ունենք ՀՀ էներգակիրներ ներմուծել առանց արտահանման մաքսատուրքերի:
Նախարարն ընդգծեց, որ եթե Հայաստանը չանդամակցեր ԵԱՏՄ-ին, ապա ավելի մեծ տնտեսական խնդիրներ կունենար, քան ունի այժմ: