Грузия Online-ի փոխանցմամբ, Վրաստանի բանտերում գործելու են Առողջապահության նախարարության չափորոշիչներին համապատասխանող դեղատներ։ Այդպիսի դեղատուն արդեն իսկ գործում է 5-րդ ուղղիչ աշխատանքային գաղութում։
Նշվում է, որ բանտային բոլոր դեղատների արտոնագրման գործընթացը կավարտվի սեպտեմբերի վերջին։
Հիշեցնենք, որ նախորդ տարի, 2009 թվականի համեմատ, վրացական բանտերում բանտարկյալների մահացության դեպքերն աճել են 50 տոկոսով: 2010 թվականին վրացական բանտերում մահացածների 32 տոկոսի (այսինքն՝ յուրաքանչյուր 3-րդ մահացած բանտարկյալի) մոտ հայտնաբերվել են այս կամ այն աստիճանի մարմնական վնասվածքներ: Վրաստանի ժողովրդական պաշտպան՝ օմբուդսմեն, Գեորգի Տուգուշիի տվյալներով, անցյալ տարի վրացական բանտերում մահացել է 142 մարդ, որոնցից 42-ը տառապել են թոքախտով:
Լոնդոնի թագավորական քոլեջի գիտնականների կողմից մշակված World Prison Population List-ի (բանտերի բնակչության համաշխարհային ցուցակ) համաձայն՝ Վրաստանը աշխարհի 217 երկրների ցանկում 6-րդ տեղն է զբաղեցնում, քանի որ երկրում 100,000 մարդուն 538 բանտարկյալ է բաժին ընկնում: Վրաստանում եղած 18 բանտերից 9-ում բանտարկյալների թիվը գերազանցում է թույլատրելի սահմանը: 8 հոգու համար նախատեսված բանտախցերում 12-13 կալանավոր են պահում: Թբիլիսիի թիվ 1 բանտում, որը նախատեսված է 750 բանտարկյալների համար, այժմ պահվում է շուրջ 1200 կալանավոր, իսկ Բաթումի բանտում բանտարկյալների թիվը 715 է՝ նախատեսված 557-ի փոխարեն: