Սերժ Սարգսյանը իրավապահ համակարգին «բեսպրեդելի» ազդանշան է տալիս

Նախագահ Սերժ Սարգսյանը Դատախազի օրվան նվիրված միջոցառման ընթացքում ծավալուն ելույթ է ունեցել, որտեղ անդրադարձ է կատարել ոլորտի մի շարք խնդիրներին։ «Անարդարությունը մեր թիվ մեկ թշնամին է, մենք պատերազմ ենք հայտարարել անարդարությանը, իրավապահ համակարգը պետք է հոմանիշ լինի իրավապաշտպանական համակարգին»,- իր ելույթում հայտարարել է Սարգսյանը։

Մինչդեռ իրավապաշտպանները կարծում են, որ Սարգսյանի ելույթը պարզապես գեղեցիկ տողեր են, որոնք այսօրվա իրականության հետ որևէ  աղերս չունեն։

Իրավապաշտպան Ժաննա Ալեքսանյանը «Առաջին լրատվական»-ի հետ զրույցում ընդգծեց. «Կարծում եմ՝ սա մի ելույթ է, որով իրավապահ համակարգին «բեսպրեդելի» ազդանշան է տրվում։ Այդ մարդը առաջին անգամ չէ, որ նման ելույթ է ունեցել՝ ասել է մոտավորապես նույն տեքստը, բայց մենք տեսանք, թե դատարանում ինչ բռնություններ են կիրառվում ամբաստանյալների նկատմամբ, ինչպես են ապականում «Սասնա ծռերի» դատական նիստերը։ Այս ֆոնի վրա իր ասած խոսքերն ինձ համար դժվար է  մեկնաբանել»,- ընդգծեց Ալեքսանյանը։

Մեր զրուցակիցը հավելում է՝ առողջ տրամաբանությունը չի կարող բացատրել, թե ինչու է Սարգսյանը ասում մեկ բան, բայց մենք ականատես ենք լինում բոլորովին այլ պատկերի:

«Այն, որ իրավապահ համակարգը իրավապաշտպանական կառույցներին պետք է հոմանիշ լինի՝ իրականությանը չի համապատասխանում, այդ համակարգն այնքան հեռու է իրավապաշտպանական գործառույթներից, որ այդ մասին խոսք լինել չի կարող։ Հատկապես ոստիկանությունն այլասերված է մեզ մոտ՝ այդ  բռնությունները, այդ հայհոյանքները բոլորովին այլ բանի մասին են խոսում։ Սերժ Սարգսյանը ինչ-որ տեքստեր կարդալով՝ ման է գալիս, բայց դրանք կապ չունեն այս երկրի, այս երկրում տեղի ունեցող իրադարձությունների հետ։ Վստահ եմ, որ Սարգսյանը գիտի, թե դատարանում ինչ է կատարվել։ Մենք այդպիսի պրակտիկա չենք ունեցել, որ ամբաստանյալներին դատարանում ծեծեն, ու ես համոզված եմ, որ դա առանց նրա գիտության լինել չէր կարող։ Ուստի կարծում եմ՝ իր պատկերացումներն իրականությանը չեն համապատասխանում»,- ասաց Ժաննա Ալեքսանյանը։

Մեր զրուցակիցը կարծում է, որ այս ելույթով Սերժ Սարգսյանը պարզապես ուզում է, որ դատախազությունը լինի էլ ավելի հնազանդ իրեն, քան եղել է նախկինում. «Սա ուղղակի զավեշտալի է, ուրիշ բան ասել չեմ կարող»։

Իրավապաշտպան Վարդան Հարությունյանը, «Առաջին լրատվական»-ի հետ զրույցում անդրադառնալով ելույթին, ասաց՝ փայլուն միտք է այն, որ իրավապահ համակարգը պետք է իրավապաշտպանական բնույթ կրի. «Կարծում եմ, որ այն մարդիկ, ովքեր գրել են Սերժ Սարգսյանի ելույթը, դրա կարևորությունը հասկացել են։ Բայց արդյոք դրա կարևորությունը հասկացե՞լ է ելույթ ընթերցողը՝ չեմ կարող ասել։ Հայաստանում և՛ արդարադատական, և՛ դատական, և՛ դատախազական, և ոստիկանական համակարգերը բոլորովին այլ վիճակում են, և դրա համար մեկ պատասխանատուն Սերժ Սարգսյանն է։ Կարծում եմ, որ նա լավ կաներ, եթե հետևեր իր ելույթի ոգուն և նաև լսեր այն մարդկանց, ովքեր իր համար այդ ելույթները գրում են»։

Սարգսյանն իր ելույթում անդրադարձել է  անարդարությանը՝ ընդգծելով, որ պետք է դրա դեմ պատերազմ հայտարարել։ Վարդան Հարությունյանից հետաքրքրվեցինք՝ արդյոք իր նախագահության հենց սկզբից ՝ 2008 թվականից, մենք տեսե՞լ ենք անարդարության դեմ պայքար կամ այդ ոլորտում որևէ առաջընթաց:

«Նրա նախագահության առաջին օրերից առ այսօր մենք հետընթաց ենք գրանցել։ Միշտ է  Հայաստանում արդարադատական համակարգը գտնվել  նախագահների վերահսկողության տակ. դա եղել  է և՛ Ռոբերտ Քոչարյանի օրոք, և՛ դրանից առաջ, բայց Սերժ Սարգսյանի օրոք դա ուղղակի միանշանակ է՝ բացառություններ գոյություն չունեն»,- եզրափակեց Վարդան Հարությունյանը։