Հայաստանում ստեղծված Volterman «խելացի» դրամապանակը, որն օժտված է 5 եզակի գործառույթներով, մեկ օրում ավելի քան 67 հազար դոլար է հավաքել բիզնեսի զարգացման համար։
Դրամական միջոցները հավաքվել են բիզնեսի ֆինանսավորման IndieGoGo միջազգային պորտալում, որտեղ հետաքրքիր ստարտափի զարգացմամբ հետաքրքրված ցանկացած անձ կարող է որոշակի գումար նվիրաբերել նախագծին։
Դրամապանակի ստեղծողներն ի սկզբանե ծրագրել էին բիզնեսի զարգացման համար մեկ ամսում հավաքել անհրաժեշտ 45 հազար դոլարը, սակայն արդյունքները գերազանցել են նրանց սպասումները։
Դրամապանակն ունի GPS գործառույթ, որն օգտակար կլինի գողության դեպքում այն հայտնաբերելիս։ Դրամապանակում ներկառուցված է տեսախցիկ։ Այն լուսանկարում է գողի դեմքն ու լուսանկարն ուղարկում տիրոջը։ Volterman-նն ունի Bluetooth alarm գործառույթ, որի շնորհիվ դրամապանակը համաժամանակեցվում է սեփականատիրոջ հեռախոսի հետ և ձայնային հաղորդագրություններ ուղարկում, եթե դրամապանակի և տիրոջ միջև հեռավորությունը մեծանում է։ Դրամապանակն ունի նաև power bank գործառույթ, որը թույլ է տալիս լիցքավորել հեռախոսն ու այլ սարքեր։
Դրամապանակը կարող է ոչ միայն լիցքավորել սարքերը, այլև ապահովել դրանք համացանցով՝ շնորհիվ WiFi hotspot գործառույթի։ WiFi բաշխելու հնարավորությունն իր տեսակի մեջ եզակի է դարձնում «հայկական» դրամապանակը։
Դրամապանակը ստեղծող Ազատ Թովմասյանի մոտ գաղափարը ծնվել է այն ժամանակ, երբ իր երեխաներից մեկը դրամապանակը դրել է հեռուստացույցի հետևում, իսկ ընտանիքի անդամները, կարծելով, որ դրամապանակն ու դրանում առկա փաստաթղթերը կորել են, երկար ժամանակ են ծախսել բոլոր փաստաթղթերի ու բանկային քարտերի վերականգնման համար։
Իր բոլոր գործառույթներով հանդերձ՝ դրամապանակը բավականի համեստ չափսեր ունի, պատրաստված է բնական կաշվից։ Դիզայնը լիովին մշակվել է Հայաստանում, սակայն արտադրությունը կկատարվի Չինաստանում։ Դրամապանակի վաճառքը ծրագրվում է սկսել 2018 թվականից։
